اسلام آباد (نیوز ڈ یسک)سرگودھا: کوٹ مومن کے نواحی علاقے میں ایک افسوسناک واقعہ پیش آیا
جہاں مبینہ طور پر شوہر کی تیسری شادی پر دوسری بیوی نے اسے قتل کرنے کے بعد خود بھی زندگی کا خاتمہ کرلیا۔
روزنامہ جنگ کے مطابق پولیس حکام کا کہنا ہے کہ علاقے کے ایک گھر سے میاں بیوی کی لاشیں برآمد ہوئیں، جس کے بعد واقعے کی اطلاع پولیس کو دی گئی۔
ڈسٹرکٹ پولیس آفیسر (ڈی پی او) کے ترجمان کے مطابق واقعے کی ابتدائی تحقیقات مکمل کرلی گئی ہیں، جبکہ مزید شواہد کی بنیاد پر معاملے کی چھان بین جاری ہے۔
پولیس کے مطابق مقتول نے واقعے سے تقریباً ایک ہفتہ قبل تیسری شادی کی تھی۔ بتایا گیا ہے کہ اس کی دوسری بیوی نے مبینہ طور پر شوہر کو اس وقت نشانہ بنایا جب وہ سو رہا تھا۔
پولیس حکام کے مطابق خاتون نے چارپائی کا پایا استعمال کرتے ہوئے شوہر کے سر پر وار کیا، جس سے وہ موقع پر ہی دم توڑ گیا۔ بعد ازاں خاتون نے بھی مبینہ طور پر خودکشی کرلی۔
پولیس ترجمان کا کہنا ہے کہ مقتول نے اپنی پہلی اہلیہ کو طلاق دینے کے بعد دوسری شادی کی تھی اور اس کے بعد تیسری شادی کرلی۔ واقعے کے تمام پہلوؤں کا جائزہ لیا جارہا ہے۔
