اسلام آباد (نیوز ڈ یسک)پنجاب حکومت نے نوجوان گریجویٹس کو عملی تجربہ اور پیشہ ورانہ تربیت فراہم کرنے کے لیے

وزیراعلیٰ پنجاب کلائمٹ لیڈرشپ ڈویلپمنٹ انٹرن شپ پروگرام فیز ٹو، بیچ تھری شروع کردیا ہے۔

پروگرام کے تحت منتخب ہونے والے امیدواروں کو تین ماہ تک ماہانہ 60 ہزار روپے وظیفہ دیا جائے گا، جبکہ انٹرنز کو ماحولیاتی شعبے سے متعلق عملی سرگرمیوں میں حصہ لینے کا موقع بھی فراہم کیا جائے گا۔

انٹرن شپ کے دوران نوجوانوں کی پیشہ ورانہ صلاحیتیں بہتر بنانے کے لیے تربیتی سیشنز کا انعقاد کیا جائے گا۔ شرکا ماہرین کی نگرانی میں موسمیاتی تبدیلی، ماحول کے تحفظ اور دیگر متعلقہ امور پر مختلف سرگرمیوں کا حصہ بنیں گے۔

پنجاب حکومت کے مطابق پروگرام کا بنیادی مقصد نئے گریجویٹس کو ان کی تعلیمی قابلیت کو عملی میدان میں استعمال کرنے کے مواقع فراہم کرنا اور انہیں ماحولیاتی شعبے میں کام کے لیے تیار کرنا ہے۔

اس پروگرام کے ذریعے انٹرنز کو ماحولیاتی منصوبہ بندی، پالیسی سازی اور فیلڈ ورک کے حوالے سے بنیادی عملی معلومات حاصل ہوں گی۔ ماہرین کے ساتھ براہ راست کام کرنے سے نوجوانوں کو اپنے تجربے اور پیشہ ورانہ مہارتوں میں اضافے کا بھی موقع ملے گا۔

حکومت کا کہنا ہے کہ انٹرن شپ مکمل کرنے والے گریجویٹس کو مستقبل میں ماحولیاتی تبدیلی، ماحولیات اور پائیدار ترقی سے متعلق شعبوں میں کیریئر بنانے میں مدد مل سکتی ہے۔ مالی وظیفے کے ساتھ عملی تربیت اور فیلڈ ایکسپوژر نوجوانوں کے لیے اس پروگرام کو مزید مفید بناتا ہے۔