اسلام آباد (نیوز ڈیسک)پاکستان کرکٹ ٹیم کے سابق کپتان اور لیجنڈری فاسٹ بولر وسیم اکرم نے انکشاف کیا ہے کہ انہوں نے بھارت کے ایک فاسٹ بولر کو اپنے کیریئر کے ابتدائی دور میں مفید مشورے دیے تھے،

تاہم بعد میں وہی کھلاڑی پاکستان کے خلاف بیانات اور سوشل میڈیا پوسٹس کرتا رہا۔ای ایس پی این اسٹار سے گفتگو کرتے ہوئے وسیم اکرم نے بتایا کہ عرفان سے ان کی پہلی ملاقات 2004 میں آسٹریلیا کے دورے کے دوران ہوئی تھی۔ ان کے مطابق عرفان انہیں بہت پسند کرتا تھا اور انہیں دیکھ کر بڑا ہوا تھا، اسی لیے وسیم اکرم نے اسے بولنگ سے متعلق چند اہم ٹپس بھی دیں۔سابق کپتان کا کہنا تھا کہ عرفان نے اپنے کیریئر کے آغاز میں اچھی کارکردگی دکھائی، جبکہ اس کا بولنگ ایکشن بھی ابتدا ہی سے ان کے ایکشن سے کافی مشابہ تھا۔ وسیم اکرم نے کہا کہ جب کوئی کھلاڑی تجربہ کار کرکٹر سے کسی معاملے پر مشورہ لیتا ہے تو اس مرحلے پر بہت سی چیزیں ذہن میں موجود ہوتی ہیں اور وہ اپنے تجربے کی بنیاد پر بہتر رہنمائی کرسکتا ہے۔

وسیم اکرم نے عرفان کو اچھا انسان قرار دیتے ہوئے کہا کہ وہ آج بھی ان سے ملاقات کرتا رہتا ہے۔ تاہم انہوں نے یہ بھی کہا کہ عرفان کبھی کبھار پاکستان کے خلاف ٹوئٹ کردیتا ہے، لیکن پاکستانی شائقین بھی اس حوالے سے خاموش نہیں رہتے۔انہوں نے مزاحیہ انداز میں کہا کہ پاکستانی مداحوں میں نظر انداز کرنے کا رجحان کم ہے اور وہ جواب دینے میں پیچھے نہیں رہتے۔