ریاض (این این آئی)شمال مغربی عرب میں ماہرینِ آثارِ قدیمہ نے ایک ایسے قدیم نخلستان کے شواہد دریافت کیے ہیں

جو تقریبا 3200 برس قبل مختلف اقسام کے مقبول اور منفرد مٹی کے برتنوں کی تیاری اور تجارت کا اہم مرکز تھا۔محققین کے مطابق قریہ کے نخلستان میں دو رنگوں سے پینٹ کیے گئے برتنوں کے شواہد ملے ہیں۔ یہ قدیم برتن سیاہ اور سرخ رنگ کے منفرد جیومیٹریکل نقش و نگار، جانوروں کی علامتی تصاویر اور انسانی اشکال سے سجائے گئے تھے۔تحقیق سے معلوم ہوتا ہے کہ یہ برتن محض گھریلو استعمال تک محدود نہیں تھے بلکہ اپنی مخصوص بناوٹ اور ڈیزائن کی وجہ سے ایک طرح کی قدیم برانڈنگ رکھتے تھے اور ممکنہ طور پر دوسرے علاقوں میں بھی فروخت یا برآمد کیے جاتے تھے۔

تحقیق کی مرکزی مصنفہ اور ماہرِ آثارِ قدیمہ ڈاکٹر مارتا لوسیانی کے مطابق یہ دریافت ظاہر کرتی ہے کہ صحرائی نخلستانوں میں رہنے والی برادریاں کانسی کے دور میں بھی پسماندہ یا وسائل سے محروم نہیں تھیں بلکہ دستیاب محدود وسائل کو استعمال کرتے ہوئے جدید اور تخلیقی طریقوں سے کام کرتی تھیں۔محققین کا کہنا ہے کہ مٹی، پانی اور ایندھن جیسے ضروری وسائل کی کمی کے باوجود قریہ کے رہائشیوں نے اپنی منفرد سیرامک روایت تشکیل دی۔نئی تحقیق جرنل پی ایل او ایس ون میں شائع ہوئی ہے اور اس سے قدیم عرب معاشروں کی تجارت، ہنرمندی اور ثقافتی روابط کے بارے میں اہم معلومات سامنے آئی ہیں۔