اسلام آباد (نیوز ڈیسک) وزیراعلیٰ خیبرپختونخوا سہیل آفریدی نے کہا ہے کہ 27 ستمبر کو ہونے والے لانگ مارچ کے دوران 20 لاکھ سے زائد افراد کو اسلام آباد لایا جائے گا اور وہ خود اس مارچ کی قیادت کریں گے۔

نوشہرہ میں شجرکاری مہم کے افتتاح کے موقع پر گفتگو کرتے ہوئے وزیراعلیٰ نے بتایا کہ لانگ مارچ تک جاری میگا شجرکاری مہم کے تحت صوبے میں 14 لاکھ پودے لگانے کا ہدف مقرر کیا گیا ہے۔سہیل آفریدی کا کہنا تھا کہ خیبرپختونخوا حکومت کی اولین ترجیح عوامی مسائل کا حل اور عوام کی فلاح و بہبود ہے۔ ان کے مطابق صوبے کی تاریخ میں پہلی مرتبہ 235 ارب روپے کا ترقیاتی بجٹ مختص کیا گیا ہے۔وزیراعلیٰ خیبرپختونخوا نے دعویٰ کیا کہ 13 اگست کی رات ایک کال پر پورا پاکستان ڈی چوک میں تبدیل ہوگیا۔ انہوں نے واضح کیا کہ 27 ستمبر کے لانگ مارچ کی قیادت وہ خود کریں گے اور بڑی تعداد میں کارکنوں اور عوام کو اسلام آباد لے کر جائیں گے۔

انہوں نے مزید کہا کہ کوئی بھی طاقت انہیں اپنے سیاسی وژن سے پیچھے ہٹنے پر مجبور نہیں کرسکتی۔ ان کا کہنا تھا کہ بانی کی رہائی کے لیے جدوجہد جاری رہے گی اور اس کے ساتھ ساتھ صوبے میں بہتر طرز حکمرانی پر بھی توجہ دی جائے گی۔