اسلام آباد (نیوز ڈیسک)وفاقی وزیر دفاع خواجہ آصف نے وفاقی وزیر داخلہ محسن نقوی سے متعلق گفتگو کرتے ہوئے کہا ہے کہ وہ موجودہ حکومت کے بااختیار ترین وزرا میں شمار ہوتے ہیں اور بعض معاملات میں انہیں وزیراعظم کو بھی جواب دہ نہیں سمجھا جاتا۔
نجی ٹی وی چینل کو دیے گئے انٹرویو میں خواجہ آصف نے کہا کہ اگرچہ محسن نقوی وزیر داخلہ ہیں، تاہم ان کا حکومتی نظام میں کردار دیگر وزرا سے مختلف دکھائی دیتا ہے۔ ان کے بقول، کابینہ کے اجلاسوں میں بھی محسن نقوی کی شرکت نہایت محدود رہی ہے اور وہ انہیں صرف چند مواقع پر ہی وہاں دیکھ سکے ہیں۔
وزیر دفاع نے مزید کہا کہ محسن نقوی کی پارلیمنٹ میں حاضری بھی بہت کم رہی ہے۔ انہوں نے طنزیہ انداز میں کہا کہ اگر اتنے بااختیار وزیر بھی موجودہ نظام پر عدم اطمینان کا اظہار کر رہے ہیں تو پھر باقی لوگوں کے لیے حکومت میں رہنے کا جواز بھی سوالیہ نشان بن جاتا ہے۔
دوسری جانب وزیر داخلہ محسن نقوی نے حال ہی میں اپنے ایک بیان میں کہا تھا کہ موجودہ حکومتی و انتظامی ڈھانچہ مؤثر انداز میں کام نہیں کر رہا۔ ان کا کہنا تھا کہ اگر یہی نظام برقرار رہا تو آئندہ دس برس بعد بھی ملک کو انہی مسائل کا سامنا رہے گا۔
محسن نقوی نے اس بات پر زور دیا تھا کہ پاکستان کی بہتر حکمرانی اور تیز رفتار ترقی کے لیے نئے انتظامی یونٹس یا مزید صوبوں کے قیام پر سنجیدگی سے غور کرنا ضروری ہے، کیونکہ موجودہ نظام اپنی افادیت کھو چکا ہے اور اس کے ذریعے عوامی مسائل کا مؤثر حل ممکن نہیں رہا۔
