اسلام آباد (نیوز ڈیسک) پاکستان اور ویسٹ انڈیز کے درمیان پہلے ٹیسٹ میچ کے دوران ویسٹ انڈین ٹیم کی ایک منفرد حکمت عملی نے کرکٹ شائقین اور ماہرین کی توجہ اپنی جانب مبذول کر لی،
جس پر سوشل میڈیا اور کرکٹ حلقوں میں مختلف آراء سامنے آ رہی ہیں۔میچ کے دوران ایک اوور کی آخری گیند پر بابر اعظم نے شاٹ کھیل کر ایک رن لینے کی کوشش کی۔ اس موقع پر ویسٹ انڈیز کے فیلڈر شمار جوزف نے فوری طور پر گیند روکنے کے بجائے اسے جان بوجھ کر باؤنڈری لائن تک جانے دیا، جس کے نتیجے میں پاکستان کو تین اضافی رنز مل گئے۔رپورٹس کے مطابق اس حکمت عملی کا مقصد بابر اعظم کو اگلے اوور میں اسٹرائیک سے دور رکھنا تھا تاکہ وہ زیادہ گیندیں کھیل کر اپنی ٹیم کے لیے فائدہ نہ اٹھا سکیں۔یاد رہے کہ بابر اعظم گزشتہ روز اعتماد کے ساتھ بیٹنگ کر رہے تھے اور ان کی فارم کو دیکھتے ہوئے ویسٹ انڈیز نے انہیں محدود رکھنے کے لیے یہ طریقہ اختیار کیا۔
واقعے کی ویڈیو سوشل میڈیا پر وائرل ہونے کے بعد کرکٹ حلقوں میں اس پر بحث چھڑ گئی۔ متعدد صارفین اور سابق کھلاڑیوں نے اس حکمت عملی کو کھیل کی روح کے خلاف قرار دیا، جبکہ کچھ شائقین کی رائے تھی کہ ٹیسٹ کرکٹ میں میچ کی صورتحال کے مطابق ایسی حکمت عملی اختیار کرنا قوانین کے دائرے میں رہتے ہوئے ایک جائز فیصلہ سمجھا جا سکتا ہے۔
