اسلام آباد (نیوز ڈیسک) پاکستان پیپلز پارٹی کے چیئرمین بلاول بھٹو بھی ٹریفک قوانین کی خلاف ورزی پر ای چالان سے نہ بچ سکے، کراچی میں ان کی زیرِ استعمال گاڑی کا چالان جاری کر دیا گیا۔

میڈیا رپورٹس کے مطابق ٹریفک پولیس ذرائع نے تصدیق کی ہے کہ 20 فروری کو جناح سگنل کے قریب سیٹ بیلٹ استعمال نہ کرنے پر گاڑی کا ای چالان کیا گیا۔ بتایا گیا ہے کہ اس وقت بلاول بھٹو زرداری خود گاڑی میں موجود تھے اور انہوں نے سیٹ بیلٹ نہیں باندھی ہوئی تھی۔

ذرائع کے مطابق اسی گاڑی کا اس سے قبل بھی 31 دسمبر 2025 کو شاہراہِ فیصل پر بلوچ کالونی پل کے مقام پر اوور اسپیڈنگ کے باعث چالان کیا گیا تھا۔

رپورٹس میں بتایا گیا ہے کہ گزشتہ روز شاہراہِ بھٹو کی افتتاحی تقریب میں شرکت کے لیے بھی بلاول بھٹو زرداری اسی گاڑی میں پہنچے تھے اور گاڑی خود چلا رہے تھے۔