اسلام آباد (نیوز ڈیسک) پاکستان کرکٹ ٹیم کے سابق فاسٹ بولر محمد عامر کو برطانوی شہریت مل گئی ہے اور برطانیہ کی جانب سے انہیں باقاعدہ پاسپورٹ جاری کر دیا گیا ہے۔
ذرائع کے مطابق محمد عامر نے چند سال قبل برطانوی شہریت اور پاسپورٹ کے حصول کے لیے درخواست دی تھی۔ تمام قانونی مراحل اور مقررہ مدت مکمل ہونے کے بعد اب انہیں برطانوی پاسپورٹ فراہم کر دیا گیا ہے۔محمد عامر نے اپنے کیریئر میں پاکستان کی جانب سے 36 ٹیسٹ، 61 ایک روزہ اور 62 ٹی ٹوئنٹی انٹرنیشنل میچز کھیلے۔ ان کی اہلیہ نرجس خان پہلے ہی برطانوی شہری ہیں، جس کے باعث عامر کی برطانیہ میں مستقل رہائش بھی رہی ہے۔برطانوی شہریت حاصل کرنے کے بعد محمد عامر اب انڈین پریمیئر لیگ (آئی پی ایل) میں شرکت کے لیے بھی اہل ہو گئے ہیں۔
واضح رہے کہ محمد عامر نے گزشتہ برس دوسری مرتبہ بین الاقوامی کرکٹ سے ریٹائرمنٹ لینے کا اعلان کیا تھا۔
