اسلام آباد (نیوزڈیسک)پاکستانی شوبز کے معروف اداکار فہد مصطفیٰ اور مہوش حیات ایک بار پھر طویل عرصے بعد بڑے پردے پر ایک ساتھ نظر آنے والے ہیں۔
دونوں فنکار آٹھ برس بعد ہارر کامیڈی فلم زومبیڈ میں جلوہ گر ہوں گے، جس کی ریلیز عیدالاضحیٰ پر متوقع ہے۔فلم کی تشہیری مہم ان دنوں زور و شور سے جاری ہے اور شائقین اس جوڑی کی واپسی کو بھرپور دلچسپی سے دیکھ رہے ہیں۔ حال ہی میں فلم کا رومانوی گانا زرا زرا جاری کیا گیا، جسے گلوکار ثمر جعفری نے اپنی آواز دی ہے۔ گانے میں دونوں اداکاروں کے رومانوی مناظر نے مداحوں کی توجہ حاصل کر لی ہے۔
پروموشنل تقریبات کے دوران فہد مصطفیٰ اور مہوش حیات نے بتایا کہ یہ فلم ان کے کیریئر کا سب سے زیادہ رومانوی پراجیکٹ ہے، جس کے باعث فلم کے حوالے سے مداحوں کا تجسس مزید بڑھ گیا ہے۔
دوسری جانب سوشل میڈیا پر گانے اور فلم کے بعض مناظر پر مختلف آراء سامنے آ رہی ہیں۔ کچھ صارفین نے ان مناظر کو ضرورت سے زیادہ بولڈ قرار دے کر تنقید کی، جبکہ کئی مداحوں نے اسے فلم کی کہانی کا حصہ قرار دیتے ہوئے اداکاروں کی کیمسٹری کو سراہا۔
بعض صارفین نے پاکستانی فلموں میں بدلتے ہوئے رجحانات پر بھی تبصرے کیے، جبکہ کچھ لوگوں نے اسے بالی ووڈ طرز کی پیشکش قرار دیا۔ اس کے برعکس کئی مداحوں کا کہنا ہے کہ پاکستانی سنیما اب بین الاقوامی معیار کی فلم سازی کی جانب بڑھ رہا ہے۔
فلم کی ریلیز سے قبل ہی فہد مصطفیٰ اور مہوش حیات کی جوڑی ایک مرتبہ پھر سوشل میڈیا پر موضوعِ بحث بن چکی ہے، اور مداح بے چینی سے فلم کے سینما گھروں میں آنے کا انتظار کر رہے ہیں۔
