اسلام آباد (نیوز ڈ یسک) لاہور کے علاقے سندر میں دو بہنوں کے ساتھ مبینہ اجتماعی زیادتی کے مقدمے میں گرفتار ملزمان مبینہ پولیس مقابلے میں ہلاک ہوگئے۔
حکام کے مطابق ملزمان سی سی ڈی کی تحویل سے فرار ہوگئے تھے، جس کے بعد ان کے خلاف ماڈل ٹاؤن سی سی ڈی تھانے میں الگ مقدمہ درج کیا گیا تھا۔پولیس کے مطابق دوبارہ گرفتاری کے لیے کارروائی کے دوران چوہنگ کے علاقے میں ملزمان اور سی سی ڈی اہلکاروں کے درمیان فائرنگ کا تبادلہ ہوا۔ اس دوران ناصر اور محی الدین نامی دونوں ملزمان اپنے ہی ساتھیوں کی فائرنگ کی زد میں آکر مارے گئے۔تحقیقات کے مطابق متاثرہ بہنیں گھریلو ملازمہ تھیں اور واقعے کے روز بس اسٹاپ پر رکشے کا انتظار کر رہی تھیں۔ پولیس کا کہنا ہے کہ تین افراد انہیں زبردستی ایک فلیٹ میں لے گئے جہاں مبینہ طور پر متعدد بار زیادتی کا نشانہ بنایا گیا۔
حکام کے مطابق متاثرہ لڑکیوں کی عمریں 27 اور 21 سال ہیں جبکہ یہ افسوسناک واقعہ 7 مئی کی رات پیش آیا۔ مقدمہ دونوں بہنوں کے والد کی مدعیت میں درج کیا گیا تھا، جبکہ پولیس واقعے کے دیگر پہلوؤں پر بھی تفتیش جاری رکھے ہوئے ہے۔
