بیجنگ (این این آئی)چین میں خاتون ملازمہ کم تنخواہ پر احتجاج کرتے ہوئے دفتر میں سو گئی جبکہ باس کی چاکلیٹ بھی کھا گئی۔
غیر ملکی میڈیا کے مطابق خاتون کافی عرصے سے اپنی تنخواہ اور کام کے ماحول سے ناخوش تھی۔ خاتون نے بتایا کہ باس کا رویہ سخت اور غیر مناسب ہے جس کے باعث وہ ذہنی دبائو کا شکار تھی، اسی تنائو کے دوران اس نے دفتر میں ہی تقریبا پانچ گھنٹے تک سونے کا فیصلہ کیا اور اپنی ڈیوٹی کے اوقات نیند میں گزار دیئے۔جب باس نے غیر معمولی رویے کی وجہ پوچھی تو خاتون نے نہ صرف بے دھڑک جواب دیا بلکہ اسی دوران اس کی میز پر موجود چاکلیٹ بھی اٹھا لی۔ بعد ازاں خاتون نے خود سوشل میڈیا پر اپنی ویڈیو شیئر کرتے ہوئے انکشاف کیا کہ اس کا باس مبینہ طور پر ایسی کیفیت میں مبتلا ہے جس میں جسم میں شوگر کی کمی ہو جاتی ہے، اس دن بروقت چاکلیٹ نہ ملنے پر وہ کمزوری کا شکار بھی ہوگیا تھا۔ ویڈیو میں خاتون نے اپنے اقدام کا دفاع کرتے ہوئے کہا کہ وہ اپنے باس کو واضح پیغام دینا چاہتی ہے کہ ملازم کو جتنی تنخواہ دی جائے، کام بھی اسی حساب سے ملتا ہے۔ خاتون نے ناقدین کو بھی جواب دیتے ہوئے کہا کہ جو لوگ کم تنخواہ پر کام نہیں کرتے، وہ اس صورتحال کو سمجھ ہی نہیں سکتے۔
