اسلام آباد (نیوز ڈیسک) پاک فوج کے شعبہ تعلقات عامہ (آئی ایس پی آر) نے اپنے اعلامیے میں بتایا ہے کہ مسلح افواج کے سربراہ فیلڈ مارشل سید عاصم منیر اور وفاقی وزیر داخلہ محسن نقوی ایک اعلیٰ سطحی وفد کے ہمراہ ایران کے دارالحکومت تہران پہنچ گئے ہیں۔
بیان کے مطابق یہ دورہ ایران اور امریکا کے درمیان جاری جنگ بندی مذاکرات سے متعلق سفارتی اور ثالثی کوششوں کو مزید آگے بڑھانے کے لیے کیا جا رہا ہے۔ اس اقدام کو خطے میں کشیدگی کم کرنے اور امن کے فروغ کے لیے پاکستان کی مسلسل کوششوں کا حصہ قرار دیا گیا ہے۔
عرب ذرائع ابلاغ کے مطابق تہران پہنچنے پر پاکستانی وفد کا استقبال ایرانی وزیر خارجہ عباس عراقچی نے کیا، جبکہ دیگر اعلیٰ ایرانی حکام بھی اس موقع پر موجود تھے۔
ایرانی میڈیا رپورٹس کے مطابق وفد مختلف اعلیٰ سطحی ملاقاتیں کرے گا، جن میں مذاکرات کے آئندہ مرحلے کی تیاری پر گفتگو متوقع ہے۔
آئی آر آئی بی نیوز ایجنسی نے بھی اپنی رپورٹ میں بتایا ہے کہ ایران اور امریکا کے درمیان مذاکرات کا دوسرا مرحلہ جلد اسلام آباد میں ہونے کا امکان ہے۔
