اسلام آباد (نیوز ڈیسک) — ٹی ٹوئنٹی ورلڈکپ میں مایوس کن کارکردگی کے باوجود پاکستان کرکٹ ٹیم میں بڑی تبدیلیاں نہ کرنے کا فیصلہ کر لیا گیا ہے۔
ذرائع کے مطابق پاکستان کرکٹ بورڈ نے یہ طے کیا ہے کہ فی الحال کسی بھی فارمیٹ میں نہ کپتان تبدیل کیا جائے گا اور نہ ہی کوچنگ اسٹاف میں رد و بدل کیا جائے گا۔ بورڈ اس بار ماضی کے برعکس پالیسیوں میں تسلسل برقرار رکھنے کا خواہاں ہے۔اطلاعات کے مطابق ون ڈے اور ٹی ٹوئنٹی ٹیم کے ہیڈ کوچ مائیک ہیسن معاہدے کے مطابق اپنی ذمہ داریاں انجام دیتے رہیں گے۔ اسی طرح بورڈ نے ٹی ٹوئنٹی ٹیم کی قیادت سلمان علی آغا اور ون ڈے ٹیم کی کپتانی شاہین شاہ آفریدی کو برقرار رکھنے کا فیصلہ کیا ہے۔ذرائع کا کہنا ہے کہ کرکٹ بورڈ شکست کے بعد فوری طور پر کپتان یا کوچ تبدیل کرنے کے بجائے انہیں مزید اعتماد دینا چاہتا ہے۔ دوسری جانب سلیکٹر علیم ڈار کی جانب سے دیا گیا استعفیٰ قبول کرنے کا فیصلہ بھی کر لیا گیا ہے۔
مزید یہ کہ ٹیسٹ ٹیم کے ہیڈ کوچ اظہر محمود کے مستعفی ہونے کے بعد اس عہدے کے لیے سابق کپتان سرفراز احمد کو منتخب کرنے کا فیصلہ کیا گیا ہے۔ وہ ابوظبی سے وطن واپسی کے بعد بطور ہیڈ کوچ اپنی ذمہ داریاں سنبھالیں گے۔اس کے علاوہ ڈائریکٹر ہائی پرفارمنس سینٹر عاقب جاوید اور موجودہ سلیکشن کمیٹی بھی بدستور اپنی ذمہ داریاں انجام دیتی رہے گی۔
