اسلام آباد (نیوز ڈیسک) اسرائیلی ذرائع ابلاغ میں یہ دعویٰ کیا جا رہا ہے کہ ایران کے سپریم لیڈر آیت اللہ علی خامنہ ای کی شہادت کے بعد ملک کے نئے رہبر کا انتخاب کر لیا گیا ہے۔
میڈیا رپورٹس کے مطابق اسرائیلی میڈیا کا کہنا ہے کہ آیت اللہ خامنہ ای کے صاحبزادے مجتبیٰ خامنہ ای کو ایران کا نیا سپریم لیڈر منتخب کر لیا گیا ہے۔ تاہم اس دعوے کی ایران کی جانب سے باضابطہ تصدیق نہیں کی گئی۔دوسری طرف ایرانی میڈیا رپورٹس میں بتایا جا رہا ہے کہ نئے سپریم لیڈر کے انتخاب کے لیے مجلس خبرگان کا اجلاس جاری ہے۔ پاسدارانِ انقلاب کے مطابق اس اہم فیصلے میں کچھ وقت لگ سکتا ہے اور ممکن ہے کہ نئے رہبر کے انتخاب کا عمل تقریباً ایک ہفتے تک جاری رہے۔ادھر ایرانی حکام نے اعلان کیا ہے کہ شہید سپریم لیڈر آیت اللہ علی خامنہ ای کو مشہد میں سپرد خاک کیا جائے گا۔ تدفین کی تاریخ اور مرکزی تقریب کی تفصیلات بعد میں جاری کی جائیں گی۔
ایرانی خبر رساں ایجنسی فارس کے مطابق رہبر انقلاب کی تدفین سے قبل ایک بڑی یادگاری تقریب منعقد کی جائے گی جس کے بعد انہیں مقدس شہر مشہد میں دفن کیا جائے گا۔ بتایا جاتا ہے کہ آیت اللہ خامنہ ای کی پیدائش بھی مشہد میں ہوئی تھی جبکہ ان کے والد کی قبر امام رضا کے مزار کے احاطے میں موجود ہے۔
