اسلام آباد (نیوز ڈیسک) سری لنکا کے دورے کے دوران ایک پاکستانی کرکٹر کو مبینہ طور پر ایک خاتون کے ساتھ نامناسب رویے کے الزام میں مالی جرمانے کا سامنا کرنا پڑا ہے۔
ذرائع کے مطابق یہ معاملہ اس وقت سامنے آیا جب مقامی ہوٹل کی انتظامیہ نے ٹیم مینجمنٹ کو کھلاڑی کے طرزِ عمل کے بارے میں باضابطہ شکایت دی۔ ہوٹل عملے کا مؤقف تھا کہ مذکورہ کھلاڑی نے ایک خاتون کو مبینہ طور پر ہراساں کیا، جس پر ٹیم انتظامیہ نے فوری طور پر اس معاملے کا نوٹس لیا۔ اطلاعات کے مطابق ٹیم مینجمنٹ نے ہوٹل انتظامیہ سے حاصل ہونے والی معلومات اور ابتدائی جانچ کے بعد کھلاڑی کو ضابطہ اخلاق کی خلاف ورزی کا ذمہ دار قرار دیا۔ اس کے نتیجے میں اس پر بھاری جرمانہ عائد کیا گیا۔
ذرائع کا مزید کہنا ہے کہ کھلاڑی کو آئندہ کے لیے سخت تنبیہ بھی کی گئی ہے تاکہ ایسے واقعات دوبارہ پیش نہ آئیں اور قومی ٹیم کی ساکھ متاثر نہ ہو۔
