ابو ظہبی (این این آئی)ابوظہبی میں وزارتِ دفاع نے اعلان کیا ہے کہ ایرانی میزائلوں کی ایک نئی لہر کو بھی یو اے ای کے دفاعی نظام نے کامیابی سے روک لیا۔
سرکاری بیان کے مطابق تمام میزائل فضا میں ہی تباہ کر دیئے گئے اور کسی بھی ممکنہ خطرے کو مؤثر انداز میں ناکام بنایا گیا، وزارت کے مطابق تازہ کارروائی کے دوران کسی جانی یا مالی نقصان کی اطلاع نہیں ملی۔حکام کے مطابق فضائی دفاعی نظام مکمل طور پر فعال رہا اور متعلقہ اداروں کے درمیان ہم آہنگی کے ذریعے صورتحال کو فوری کنٹرول کیا گیا۔اعلامیے میں واضح کیا گیا کہ ملکی فضائی حدود اور اہم تنصیبات کی مسلسل نگرانی کی جا رہی ہے، سکیورٹی ادارے ہائی الرٹ پر موجود ہیں اور کسی بھی پیش رفت سے نمٹنے کے لیے مکمل تیاری برقرار ہے۔عوام کو یقین دہانی کرائی گئی ہے کہ حفاظتی اقدامات مؤثر انداز میں نافذ ہیں اور صورتحال مستحکم ہے۔
وزارتِ دفاع نے شہریوں اور رہائشیوں سے اپیل کی ہے کہ وہ پرسکون رہیں، غیر مصدقہ اطلاعات سے گریز کریں اور صرف سرکاری ذرائع سے معلومات حاصل کریں، مزید اپڈیٹس باضابطہ طور پر جاری کی جائیں گی۔
