اسلام آباد (نیوز ڈ یسک)پاکستان کرکٹ کے تاریخ میں ممکنہ طور پر سب سے مہنگی ڈیل سامنے آنے والی ہے، جس سے پی سی بی کے خزانے میں اربوں روپے کا اضافہ ہو سکتا ہے۔
ذرائع کے مطابق ایک پی ایس ایل فرنچائز نے لیگ کے براڈکاسٹ حقوق کے لیے سالانہ تقریباً ساڑھے چار ارب روپے دینے کا ارادہ کیا ہے۔ اگر معاملات طے پا گئے تو چار سالہ معاہدے کی کل مالیت 18 ارب روپے تک پہنچ سکتی ہے۔پی سی بی نے کچھ عرصہ قبل چار سالہ پی ایس ایل میڈیا رائٹس کے لیے ٹینڈر جاری کیا تھا، جس پر کئی پارٹیز نے دلچسپی ظاہر کی۔ ابتدائی طور پر دو بڑے اسپورٹس چینلز بھی بڈنگ میں شامل ہوئے، تاہم ایک چینل پر 4 ارب 70 لاکھ روپے کے واجبات موجود ہیں اور دوسرے کو 60 کروڑ روپے سے زائد کی ادائیگی کرنی باقی ہے۔ بورڈ نے ان دونوں کو ادائیگی کے لیے وقت دیا، لیکن جب ادائیگیاں نہ ہو سکیں تو انہیں ڈس کوالیفائی کرنے کے خطوط ارسال کر دیے گئے۔
ذرائع کے مطابق پی ایس ایل فرنچائز خریدنے والی کمپنی اب میڈیا رائٹس میں دلچسپی رکھتی ہے اور بڈ ریکارڈ توڑ سکتی ہے۔ بعض باخبر حلقوں کے مطابق سالانہ ساڑھے چار ارب روپے اور چار سال کے لیے 18 ارب روپے کی بولی ممکن ہے۔ لائیو اسٹریمنگ کے حقوق کے لیے بڈ 7 ارب روپے تک پہنچنے کی توقع ہے، جو پاکستان کرکٹ کے لیے ایک تاریخی ڈیل ثابت ہوگی۔پی سی بی نے اس بار کنسورشیم کی اجازت نہیں دی تاکہ چینلز کی مبینہ ملی بھگت روکی جا سکے۔ ممکنہ طور پر فاتح کمپنی براڈکاسٹ کے لیے سرکاری ٹی وی کی اسکرین استعمال کرے گی۔ پاکستان میں پی ایس ایل براڈکاسٹ اور لائیو اسٹریمنگ کے لیے ٹینڈر جاری کیا گیا تھا اور کمپنیاں دونوں یا کسی ایک پر بڈ کر سکتی تھیں۔ ہر بڈ کی سیکیورٹی 10 کروڑ روپے مقرر کی گئی تھی، فاتح کمپنی کی رقم ایڈجسٹ کی جائے گی جبکہ باقی کو واپس کیا جائے گا۔ محتاط اندازوں کے مطابق ریزرو پرائس تقریباً 18 ارب روپے ہے اور لائیو اسٹریمنگ کے لیے 6 ارب روپے تک کا امکان ہے۔گزشتہ سال پی ایس ایل کے 34 میچز ہوئے تھے، جبکہ اب دو نئی ٹیموں کی شمولیت سے تعداد 44 تک پہنچ جائے گی۔
ہر سال 10 اضافی میچز شامل ہونے سے یہ چار سالہ معاہدہ سابقہ ویلیو کے لحاظ سے تقریباً پانچ سالہ بن جائے گا۔قوانین کے مطابق پروڈکشن اخراجات نکالنے کے بعد اگر براڈکاسٹ ڈیل 3 ارب روپے سے زیادہ کی ہوئی تو اضافی رقم میں سے 5 لاکھ ڈالر غیر ملکی کرکٹرز کی آئیکون فیس کے لیے مختص کیے جائیں گے، جبکہ باقی 80 فیصد پی سی بی اور 20 فیصد فرنچائز کو ملے گا۔ گزشتہ سال پروڈکشن کے اخراجات ایک ارب روپے سے زائد تھے۔ پی ایس ایل کا 11 واں ایڈیشن 26 مارچ سے شروع ہوگا۔
