اسلام آبا د (نیوز ڈیسک ) قومی کرکٹ ٹیم کے اوپننگ بلے باز صاحبزادہ فرحان نے ٹی ٹوئنٹی کرکٹ میں ایک اور نمایاں کامیابی اپنے نام کر لی ہے۔

سری لنکا میں کھیلے جانے والے ٹی ٹوئنٹی ورلڈ کپ کے دوران امریکا کے خلاف میچ میں صاحبزادہ فرحان نے ٹی ٹوئنٹی انٹرنیشنل کرکٹ میں اپنے ایک ہزار رنز مکمل کیے۔ 29 سالہ بیٹر نے یہ سنگِ میل اپنی 41ویں اننگز میں عبور کیا۔اس کارنامے کے ساتھ وہ پاکستان کی جانب سے ٹی ٹوئنٹی انٹرنیشنل میں ایک ہزار رنز بنانے والے دسویں کھلاڑی بن گئے ہیں۔ اس سے قبل یہ اعزاز بابر اعظم، محمد رضوان، محمد حفیظ، شعیب ملک، فخر زمان، عمر اکمل، احمد شہزاد، شاہد آفریدی اور صائم ایوب حاصل کر چکے ہیں۔امریکا کے خلاف میچ میں صاحبزادہ فرحان نے شاندار بیٹنگ کا مظاہرہ کرتے ہوئے 41 گیندوں پر 73 رنز بنائے، جس کی بدولت قومی ٹیم کو بڑا اسکور ترتیب دینے میں نمایاں مدد ملی۔