اسلام آباد (نیوز ڈیسک) ٹی ٹوئنٹی ورلڈ کپ میں پاکستان کی جانب سے بھارت کے خلاف میچ نہ کھیلنے کے فیصلے پر انٹرنیشنل کرکٹ کونسل (آئی سی سی) نے اپنا مؤقف سامنے لے آیا ہے۔

آئی سی سی کی طرف سے جاری کیے گئے اعلامیے میں کہا گیا ہے کہ کونسل نے حکومتِ پاکستان کے اس بیان کا نوٹس لیا ہے جس میں قومی ٹیم کو آئی سی سی مینز ٹی ٹوئنٹی ورلڈ کپ 2026 میں شرکت سے متعلق ہدایات دی گئی ہیں۔بیان میں مزید کہا گیا ہے کہ آئی سی سی اس معاملے پر پاکستان کرکٹ بورڈ کے باضابطہ فیصلے کی منتظر ہے، تاہم یہ طرزِ عمل عالمی کھیلوں کے ایونٹ کے اس بنیادی اصول سے مطابقت نہیں رکھتا جہاں کوالیفائی کرنے والی تمام ٹیموں سے یہ توقع کی جاتی ہے کہ وہ طے شدہ شیڈول کے تحت مساوی بنیادوں پر مقابلہ کریں۔آئی سی سی کے مطابق اس کے تمام ٹورنامنٹس کھیل کی شفافیت، مسابقت، تسلسل اور انصاف کے اصولوں پر قائم ہوتے ہیں۔ اگرچہ کونسل قومی معاملات میں حکومتوں کے کردار کا احترام کرتی ہے، تاہم اس نوعیت کے فیصلے عالمی کرکٹ اور دنیا بھر کے شائقین، خصوصاً پاکستان کے لاکھوں مداحوں، کے مفاد کے خلاف ہو سکتے ہیں۔اعلامیے میں کہا گیا ہے کہ آئی سی سی کو امید ہے کہ پاکستان کرکٹ بورڈ اس فیصلے کے ملکی اور طویل المدتی اثرات پر سنجیدگی سے غور کرے گا، کیونکہ ایسے اقدامات عالمی کرکٹ کے نظام کو متاثر کر سکتے ہیں، جس کا پی سی بی خود بھی حصہ اور فائدہ اٹھانے والا رکن ہے۔

آئی سی سی نے واضح کیا کہ اس کی اولین ترجیح آئی سی سی مینز ٹی ٹوئنٹی ورلڈ کپ کا کامیاب انعقاد ہے اور اس ذمہ داری کی ادائیگی پی سی بی سمیت تمام رکن ممالک پر عائد ہوتی ہے۔ کونسل کو توقع ہے کہ پی سی بی تمام متعلقہ فریقین کے مفادات کو مدنظر رکھتے ہوئے باہمی طور پر قابلِ قبول حل کی جانب پیش رفت کرے گا۔