اسلام آباد (نیوز ڈیسک) پاکستان اور جرمنی کے درمیان دوہری شہریت کے حوالے سے ایک نمایاں اور اہم پیش رفت سامنے آئی ہے، جسے دونوں ممالک کے تعلقات میں ایک تاریخی قدم قرار دیا جا رہا ہے۔جرمنی میں قائم پاکستانی سفارت خانے نے اعلان کیا ہے کہ دوہری شہریت سے متعلق تمام قانونی، آئینی اور انتظامی تقاضے مکمل کر لیے گئے ہیں۔ اس پیش رفت کے بعد جرمنی کو باضابطہ طور پر اُن ممالک کی فہرست میں شامل کر لیا گیا ہے جن کے ساتھ پاکستان دوہری شہریت کی اجازت دیتا ہے۔برلن میں پاکستانی سفارت خانے کی جانب سے جاری کردہ عوامی نوٹس کے مطابق اب جرمنی میں رہائش پذیر پاکستانی نژاد افراد جرمن شہریت حاصل کرنے کے باوجود اپنی پاکستانی شہریت برقرار رکھ سکیں گے۔ اس سے قبل جرمن شہریت لینے کے لیے پاکستانی شہریت چھوڑنا لازم تھا۔
سفارتی ذرائع کے مطابق یہ فیصلہ جرمنی میں مقیم پاکستانی کمیونٹی کے ایک دیرینہ مطالبے کی تکمیل ہے، جس سے ہزاروں تارکینِ وطن کو قانونی تحفظ اور عملی سہولت میسر آئے گی۔ماہرین کا کہنا ہے کہ اس اقدام سے پاکستان اور جرمنی کے درمیان سماجی، معاشی اور سرمایہ کاری کے شعبوں میں تعلقات مزید مضبوط ہوں گے، جبکہ دونوں ممالک کے درمیان روابط میں بھی اضافہ متوقع ہے۔اعلامیے میں یہ بھی بتایا گیا ہے کہ وہ پاکستانی نژاد افراد جنہوں نے ماضی میں جرمن شہریت حاصل کرنے کے لیے اپنی پاکستانی شہریت ترک کی تھی، ان کے لیے شہریت کی بحالی (ری ایکوزیشن) کے طریقۂ کار، شرائط اور درکار دستاویزات سے متعلق تفصیلات جلد جاری کی جائیں گی۔ اس سلسلے میں متعلقہ اداروں کے ساتھ مشاورت جاری ہے۔دوہری شہریت کی اجازت کے بعد جرمنی میں مقیم پاکستانیوں کو روزگار، کاروبار، تعلیم اور سفری امور میں نمایاں آسانیاں حاصل ہوں گی، جبکہ پاکستان میں جائیداد، بینکاری، سرمایہ کاری اور خاندانی معاملات کے حوالے سے بھی انہیں بہتر قانونی سہولیات دستیاب ہوں گی۔
