اسلام آباد (نیوز ڈیسک)بالی وڈ کے مشہور و معروف اداکار اور لیجنڈ دھرمیندر طویل عرصے کی علالت کے بعد 89 سال کی عمر میں انتقال کر گئے۔انڈیا ٹوڈے کے مطابق، منگل 11 نومبر کی صبح اداکار کے قریبی ذرائع اور ان کی ٹیم نے ان کے انتقال کی تصدیق کی۔ دھرمیندر کو گزشتہ روز ممبئی کے بریچ کینڈی اسپتال منتقل کیا گیا تھا، جہاں وہ وینٹی لیٹر پر زیر علاج تھے۔بھارتی میڈیا نے بتایا کہ چند روز قبل بھی انہیں سانس لینے میں دشواری کے باعث اسپتال داخل کرایا گیا تھا۔ رواں سال اپریل میں ان کی آنکھ کا آپریشن بھی ہوا تھا۔

رپورٹس کے مطابق دھرمیندر کی آخری فلم “اکیس” ہے، جو 25 دسمبر کو ریلیز کے لیے تیار ہے۔1960 میں فلم “دل بھی تیرا ہم بھی تیرے” سے فلمی کیریئر کا آغاز کرنے والے دھرمیندر نے تقریباً چھ دہائیوں تک بھارتی سینما پر راج کیا۔ ان کی مشہور فلموں میں “شعلے”، “میرا گاؤں میرا دیش”، “یادوں کی بارات” اور “پھول اور پتھر” شامل ہیں، جنہوں نے انہیں ایک ناقابلِ فراموش اداکار بنا دیا۔حکومتِ ہند نے ان کی فنی خدمات کے اعتراف میں انہیں پدم بھوشن ایوارڈ (2012) سے نوازا تھا۔پنجاب کے لدھیانہ میں کیول کرشن دیول کے نام سے پیدا ہونے والے دھرمیندر نے 19 سال کی عمر میں پرکاش کور سے شادی کی، بعدازاں وہ معروف اداکارہ ہیما مالنی کے شریکِ حیات بنے۔بڑھتی عمر کے باوجود دھرمیندر سوشل میڈیا پر خاصے فعال تھے۔ وہ اکثر اپنی ویڈیوز میں کاشتکاری، سادہ طرزِ زندگی، صحت مند عادات اور مثبت سوچ کے بارے میں مشورے دیتے نظر آتے تھے۔ان کے انتقال کی خبر نے بھارتی فلم انڈسٹری اور دنیا بھر میں موجود ان کے مداحوں کو غمگین کر دیا۔