اسلام آباد (نیوز ڈیسک) بالی ووڈ کی مشہور اداکارہ ماہیما چوہدری اور اداکار سنجے مشرا کی شادی سے متعلق گردش کرنے والی خبروں کی حقیقت آخرکار سامنے آگئی۔ذرائع کے مطابق، ماہیما چوہدری — جو فلموں پردیس، دھڑکن اور ایمرجنسی میں اپنی شاندار اداکاری کے لیے جانی جاتی ہیں — کے بارے میں سوشل میڈیا پر یہ دعویٰ کیا جا رہا تھا کہ انہوں نے سنجے مشرا سے شادی کر لی ہے۔ تاہم، یہ تمام خبریں بے بنیاد ثابت ہوئیں۔درحقیقت، دونوں فنکاروں کی شادی کی وائرل ویڈیو ان کی نئی فلم درلبھ پرساد کی دوسری شادی کی پروموشن کا حصہ تھی۔

فلم کی ہدایتکاری سدھانت راج نے کی ہے، جب کہ دیگر کاسٹ میں دیویتا جونیجا، پرت کمانی اور آشی توش رانا شامل ہیں۔ویڈیو منظر عام پر آنے کے بعد مداحوں اور صارفین نے یہ قیاس آرائیاں شروع کر دی تھیں کہ ماہیما چوہدری نے برسوں بعد دوبارہ شادی کر لی ہے، لیکن اب یہ واضح ہو گیا ہے کہ یہ سب فلم کی تشہیر کے لیے تھا۔ذاتی زندگی کے حوالے سے بات کی جائے تو ماہیما چوہدری 2006 میں معروف آرکیٹیکٹ اور بزنس مین بوبی مکھرجی کے ساتھ رشتۂ ازدواج میں منسلک ہوئیں۔ 2007 میں ان کے ہاں بیٹی آریانا کی پیدائش ہوئی، تاہم 2013 میں دونوں کے درمیان علیحدگی ہو گئی۔ایک پرانے انٹرویو میں ماہیما نے اعتراف کیا تھا کہ شوہر سے علیحدگی کے بعد بیٹی کی پرورش اور پیشہ ورانہ زندگی کو ایک ساتھ سنبھالنا ان کے لیے نہایت مشکل ثابت ہوا۔ انہوں نے یہ بھی بتایا کہ علیحدگی سے قبل انہیں دو بار اسقاط حمل کے صدمے سے گزرنا پڑا۔