اسلام آباد (نیوز ڈیسک)معروف پاکستانی گلوکارہ نصیبو لعل نے خوشی کے ساتھ اعلان کیا ہے کہ وہ اب دادی بن چکی ہیں۔گزشتہ چند دنوں سے سوشل میڈیا پر مختلف پلیٹ فارمز پر یہ خبریں گردش کر رہی تھیں کہ 56 سالہ نصیبو لعل کے ہاں بیٹے کی پیدائش ہوئی ہے۔ ان افواہوں کو تقویت اس وقت ملی جب ایک تصویر وائرل ہوئی جس میں انہیں سرخ لباس میں ایک نومولود بچے کے ساتھ دیکھا گیا، اور ان کے شوہر بھی تصویر میں موجود تھے۔تاہم اب گلوکارہ نے خود سچائی بیان کرتے ہوئے ان تمام باتوں کی وضاحت کر دی ہے۔

نصیبو لعل نے اپنے فیس بک اکاؤنٹ پر ایک پوسٹ میں اللہ کا شکر ادا کرتے ہوئے بتایا کہ ’’الحمداللہ، میں دادی بن گئی ہوں‘‘۔اس سے پہلے بھی انہوں نے ایک پوسٹ میں نومولود بچے کی تصویر شیئر کرتے ہوئے مداحوں سے کہا تھا کہ وہ بچے کے لیے کوئی خوبصورت اور منفرد نام تجویز کریں۔دوسری جانب، سوشل میڈیا پر ایک ویڈیو بھی سامنے آئی ہے جس میں نصیبو لعل کو اسپتال میں گانا گاتے ہوئے دیکھا جا سکتا ہے۔ بتایا گیا ہے کہ انہوں نے اپنے پوتے کی پیدائش کی خوشی میں اسپتال کے عملے کے لیے اپنا مشہور گیت “کدی تے ہنس بول وے” پیش کیا۔