راولپنڈی (این این آئی)قومی کرکٹ ٹیم کے اسٹار بیٹر بابر اعظم نے جنوبی افریقہ کے خلاف کھیلے گئے ٹی ٹوئنٹی سیریز کے پہلے میچ میں شاہد آفریدی کا ناپسندیدہ ریکارڈ برابر کر دیا۔جنوبی افریقہ کے خلاف بابر اعظم صرف 2 گیندوں پر بغیر کوئی رن بنائے آئوٹ ہوئے، انہیں کوربن بوش نے صفر پر پویلین لوٹایا۔اس اننگز کے ساتھ بابر اعظم نے ٹی ٹوئنٹی انٹرنیشنل میں آٹھویں مرتبہ صفر پر آئوٹ ہونے کا شاہد آفریدی کا ناپسندیدہ ریکارڈ برابر کر دیا۔

بابر اعظم ٹی ٹوئنٹی انٹرنیشنل میں سب سے زیادہ مرتبہ صفر پر آئوٹ ہونے والے پاکستانی کھلاڑیوں کی فہرست میں شاہد آفریدی کے ساتھ تیسرے نمبر پر آگئے۔اس فہرست میں عمر اکمل 10 بار صفر پر آئوٹ ہو کر پہلے نمبر پر موجود ہیں جبکہ صائم ایوب 9 بار صفر پر آئوٹ ہو کر دوسرے نمبر پر ہیں۔شاہد آفریدی اس فہرست میں چوتھے، کامران اکمل 7 بار صفر پر آئوٹ ہو کر پانچویں اور محمد حفیظ بھی 7 بار صفر پر آئوٹ ہو کر اس فہرست میں چھٹے نمبر پر موجود ہیں۔واضح رہے کہ گزشتہ روز جنوبی افریقہ نے پہلے ٹی 20 میچ میں پاکستان کو 55 رنز سے شکست دے کر سیریز میں 1-0 کی برتری حاصل کر لی ہے۔