اسلام آباد (اسپورٹس ڈیسک) آسٹریلیا کی کرکٹ ٹیم 2026 کے اوائل میں پاکستان کا دورہ کرے گی، جس دوران دونوں ٹیموں کے درمیان دو مرحلوں پر مشتمل وائٹ بال سیریز کھیلی جائے گی۔
ذرائع کے مطابق دورے کے پہلے حصے میں تین ٹی ٹوئنٹی میچز شامل ہوں گے، جو 30 جنوری سے 5 فروری تک شیڈول ہیں۔ یہ سیریز بھارت اور سری لنکا میں ہونے والے ٹی ٹوئنٹی ورلڈ کپ 2026 سے قبل کھیلی جائے گی۔
ورلڈ کپ کے اختتام کے بعد دوسرا مرحلہ مارچ میں شروع ہوگا، جس میں تین ایک روزہ میچز 13 سے 19 مارچ تک منعقد کیے جائیں گے۔ پاکستان کرکٹ بورڈ (پی سی بی) جلد ہی سیریز کے وینیوز اور مکمل شیڈول کا باضابطہ اعلان کرے گا۔
کرکٹ آسٹریلیا کے چیف ایگزیکٹو آفیسر ٹوڈ گرین برگ نے 3 جون کو ایک آن لائن پریس کانفرنس کے دوران پاکستان کے دورے پر اطمینان کا اظہار کیا۔ ان کا کہنا تھا کہ “ہمیں یقین ہے کہ یہ پاکستان کا ایک مزید شاندار اور یادگار دورہ ہوگا۔ پاکستان کے خلاف سیریز ہمیشہ ہمارے کیلنڈر کا اہم حصہ رہتی ہے۔”
واضح رہے کہ قومی ٹیم نے نومبر 2024 میں آسٹریلیا کا دورہ کیا تھا، جہاں محمد رضوان کی قیادت میں پاکستان نے ایک روزہ سیریز 1-2 سے جیت کر 2002 کے بعد پہلی مرتبہ آسٹریلوی سرزمین پر تاریخی کامیابی حاصل کی تھی۔
البتہ میزبان ٹیم نے بعد ازاں ٹی ٹوئنٹی سیریز میں 0-3 سے کلین سوئپ کرتے ہوئے بدلہ برابر کر لیا تھا۔
