اسلام آباد (نیوز ڈیسک) بالی ووڈ کے سپر اسٹار شاہ رخ خان نہ صرف اپنی شاندار اداکاری بلکہ اپنی مثبت سوچ اور زندگی کے اصولوں کی بدولت بھی مداحوں کے دلوں میں خاص مقام رکھتے ہیں۔حال ہی میں ان کا ایک پرانا ویڈیو کلپ سوشل میڈیا پر تیزی سے وائرل ہو رہا ہے، جس میں وہ اپنے مداحوں کو ’دسترخوان‘ پر بیٹھ کر کھانا کھانے کی اہمیت کے بارے میں نہایت خوبصورت انداز میں بات کرتے دکھائی دے رہے ہیں۔ویڈیو میں شاہ رخ خان کہتے ہیں کہ ’’ہمیں بچپن سے سکھایا گیا ہے کہ اگر ممکن ہو تو زمین پر دسترخوان بچھا کر کھانا کھائیں، کیونکہ یہ ہمارے نبی کریم ﷺ کی سنت ہے۔‘‘انہوں نے وضاحت کی کہ ’’دسترخوان دراصل وہ مقام ہے جہاں انسان زمین پر ٹانگیں اندر کی جانب موڑ کر بیٹھتا ہے۔
اس پوزیشن میں کھانے سے معدے کا ایک حصہ دبتا ہے، جس سے انسان کم کھاتا ہے مگر اسے بھرپور تسکین محسوس ہوتی ہے۔‘‘شاہ رخ خان نے مزید کہا کہ ’’ہم اکثر کھانے کے دوران ضرورت سے زیادہ کھا لیتے ہیں، جو صحت کے لیے نقصان دہ ہے۔ تھوڑی بھوک باقی رہنے دینا جسم کے لیے بہتر ہوتا ہے۔‘‘کنگ خان نے مسکراتے ہوئے کہا کہ اگرچہ وہ اس بات کے سائنسی پہلو سے پوری طرح واقف نہیں، مگر انہیں یقین ہے کہ یہی کھانے کا سب سے متوازن اور صحت مند طریقہ ہے۔یہ ویڈیو مداحوں کی جانب سے خوب سراہا جا رہا ہے، اور لوگ شاہ رخ خان کے سادہ، منظم اور روایتی طرزِ زندگی کی تعریف کرتے نظر آ رہے ہیں۔اداکار کے کام کی بات کی جائے تو وہ حال ہی میں 70ویں فلم فیئر ایوارڈز میں شریک ہوئے، جہاں انہیں اپنے شاندار کیریئر کا پہلا نیشنل ایوارڈ ملا۔شاہ رخ خان جلد اپنی نئی فلم ’’کنگ‘‘ میں جلوہ گر ہوں گے، جس میں دیپیکا پاڈوکون اور ان کی بیٹی سہانا خان بھی اہم کردار ادا کر رہی ہیں۔
