اسلا آباد (نیوز ڈیسک ) اگلے سال ٹی ٹوئنٹی ورلڈ کپ کو مدِنظر رکھتے ہوئے قومی ٹیم کے سلیکٹرز نے کپتان سلمان علی آغا کی قیادت سے متعلق تبدیلی پر غور شروع کر دیا ہے، جبکہ سینیئر کھلاڑیوں کی ٹیم میں واپسی کا بھی امکان ظاہر کیا جا رہا ہے۔ذرائع کے مطابق سلمان علی آغا کو ایشیا کپ میں ناقص بیٹنگ اور کمزور کپتانی کے باعث شدید تنقید کا سامنا رہا۔ انہوں نے ایونٹ میں 7 اننگز میں صرف 72 رنز اسکور کیے، ان کی اوسط 12 اور اسٹرائیک ریٹ 80 رہا۔

اہم مواقع پر ان کی ناکامی نے ٹیم کے نتائج پر بھی اثر ڈالا۔سلیکشن کمیٹی کے قریبی ذرائع کے مطابق، ٹی ٹوئنٹی فارمیٹ کی قیادت کے لیے سلمان علی آغا کی پوزیشن غیر یقینی ہو گئی ہے۔ آئندہ ٹی ٹوئنٹی ورلڈ کپ 2026 کے پیش نظر سلیکٹرز نئی قیادت کے آپشنز پر غور کر رہے ہیں۔ادھر جنوبی افریقہ کے خلاف وائٹ بال سیریز کے لیے اسکواڈ پر مشاورت جاری ہے، اور امکان ظاہر کیا جا رہا ہے کہ ٹی ٹوئنٹی اور ون ڈے ٹیموں میں دو سے تین تبدیلیاں کی جائیں گی۔

ذرائع کا کہنا ہے کہ کچھ سینیئر کھلاڑیوں کی واپسی کے ساتھ ساتھ نئے کھلاڑیوں کو موقع دینے پر بھی غور ہو رہا ہے۔شیڈول کے مطابق، پاکستان اور جنوبی افریقہ کے درمیان تین ٹی ٹوئنٹی اور تین ون ڈے میچز کھیلے جائیں گے۔ٹی ٹوئنٹی سیریز کا پہلا میچ 28 اکتوبر کو راولپنڈی میں منعقد ہوگا، جب کہ اس سے قبل دونوں ٹیمیں دو ٹیسٹ میچز میں مدمقابل ہوں گی۔