اسلا آباد (نیوز ڈیسک ) بھارتی اداکار اور فلم پروڈیوسر ہمنت کمار کو ایک اداکارہ کی شکایت پر جنسی ہراسانی، دھوکا دہی اور دھمکیاں دینے کے الزامات کے تحت گرفتار کر لیا گیا۔بھارتی میڈیا کے مطابق ہمنت کمار کو راجاجی نگر پولیس نے حراست میں لیا، جب ایک ٹی وی اداکارہ نے ان کے خلاف سنگین نوعیت کی شکایت درج کرائی۔ شکایت میں اداکارہ نے الزام عائد کیا کہ ہمنت کمار نے نہ صرف انہیں جنسی طور پر ہراساں کیا بلکہ فریب اور دھمکیوں کا بھی سہارا لیا۔اداکارہ کے بیان کے مطابق، سال 2022 میں ہمنت کمار نے انہیں فلم “رِچی” میں مرکزی کردار کی پیشکش کی تھی۔ طے شدہ دو لاکھ روپے معاوضے میں سے صرف 60 ہزار روپے بطور پیشگی ادا کیے گئے، جبکہ بقیہ رقم ادا نہ کی گئی۔

اداکارہ نے مزید بتایا کہ فلم کی شوٹنگ اور تشہیر کے دوران ہمنت نے انہیں کئی مواقع پر ہراساں کیا۔ ایک موقع پر وہ انہیں فلم کی پروموشن کے بہانے ممبئی لے گیا، جہاں مبینہ طور پر شراب پلائی گئی اور ان کی نجی ویڈیوز اور تصاویر خفیہ طور پر بنائی گئیں۔شکایت میں یہ بھی کہا گیا ہے کہ ہمنت کمار نے اداکارہ پر غیر مناسب لباس پہننے پر زور دیا، اور جب انہوں نے انکار کیا تو مبینہ طور پر غنڈے بھیج کر دھمکیاں دیں۔پولیس نے اداکارہ کی شکایت پر کارروائی کرتے ہوئے ہمنت کمار کو گرفتار کر لیا ہے۔ ان پر یہ الزام بھی لگایا گیا ہے کہ انہوں نے بغیر سینسر بورڈ کی اجازت کے فلم کے کچھ مناظر سوشل میڈیا پر جاری کیے اور اداکارہ کی ذاتی معلومات شیئر کر کے ان کی ساکھ متاثر کرنے کی کوشش کی۔