اسلام آباد (نیوز ڈیسک) موجودہ دور میں فضائی آلودگی انسانی صحت کے لیے ایک بڑا خطرہ بن چکی ہے، جس کے نتیجے میں بالخصوص پھیپھڑوں پر منفی اثرات مرتب ہو رہے ہیں۔
برطانیہ میں کی جانے والی ایک طبی تحقیق کے مطابق پھلوں کو معمول کا حصہ بنانے سے پھیپھڑوں کو فضائی آلودگی سے لاحق نقصانات سے بچایا جا سکتا ہے۔ ماہرین کے مطابق روزانہ سیب سمیت مختلف پھل کھانے سے پھیپھڑوں کے افعال بہتر رہتے ہیں۔
لیسٹر یونیورسٹی کے محققین نے اس تحقیق کے دوران یوکے بائیو بینک کے دو لاکھ افراد کے ڈیٹا کا تجزیہ کیا جس میں ان کی غذائی عادات، فضائی آلودگی کی سطح اور پھیپھڑوں کی صحت کے اعدادوشمار شامل تھے۔
نتائج سے ظاہر ہوا کہ آلودگی کے ذرات میں معمولی اضافے کے باوجود وہ افراد جو پھل زیادہ کھاتے تھے ان کے پھیپھڑوں پر اس کے اثرات کم ہوئے، جبکہ پھل کم استعمال کرنے والوں میں سانس کے مسائل زیادہ دیکھے گئے۔ تحقیق میں بتایا گیا کہ خواتین پھلوں کا زیادہ استعمال کرتی ہیں جس کی وجہ سے انہیں پھیپھڑوں کے امراض سے نسبتاً بہتر تحفظ حاصل ہوتا ہے۔
ماہرین کا کہنا ہے کہ پھلوں اور سبزیوں میں موجود اینٹی آکسائیڈنٹس اور ورم کم کرنے والے اجزا فضائی آلودگی سے پیدا ہونے والے تناؤ اور سوزش کو کم کرتے ہیں۔ ان کا مزید کہنا تھا کہ یہ تحقیق اس بات کا ثبوت ہے کہ متوازن اور صحت مند غذا مرد و خواتین دونوں کے پھیپھڑوں کی کارکردگی میں بہتری لا سکتی ہے۔
محققین نے اعلان کیا ہے کہ وہ مستقبل میں مزید تحقیق کریں گے تاکہ یہ جان سکیں کہ وقت گزرنے کے ساتھ غذا کس طرح پھیپھڑوں کی صحت کو متاثر کرتی ہے۔
یہ نتائج یورپین ریسپیریٹری سوسائٹی کانگریس کے موقع پر پیش کیے گئے۔
