اسلا م آباد (نیوز ڈیسک ) ایشیا کپ میں سری لنکا اور افغانستان کے درمیان ہونے والے میچ کے دوران افسوسناک واقعہ پیش آیا جب سری لنکن کھلاڑی دونتھ ویلالاگے کے والد مبینہ طور پر دل کا دورہ پڑنے سے انتقال کر گئے۔تفصیلات کے مطابق دبئی میں کھیلے گئے میچ میں 22 سالہ ویلالاگے کو افغانستان کے آل راؤنڈر محمد نبی نے ایک ہی اوور میں مسلسل پانچ چھکے جڑ دیے، جس کی بدولت اوور میں 32 رنز بنے۔ رپورٹ کے مطابق اس دوران کولمبو میں موجود ان کے والد ٹی وی پر میچ دیکھ رہے تھے۔
بیٹے کی کارکردگی کے سبب وہ شدید دباؤ کا شکار ہوگئے اور اچانک سینے میں تکلیف کی شکایت ہوئی۔ انہیں فوری طور پر اسپتال منتقل کیا گیا مگر جانبر نہ ہوسکے۔میچ کے دوران جب یہ خبر ویلالاگے تک پہنچی تو انہیں میدان سے باہر بلایا گیا۔ اس موقع پر اسٹیڈیم کا ماحول غمگین ہوگیا اور واقعے کی ویڈیو سوشل میڈیا پر تیزی سے پھیل گئی۔یاد رہے کہ اس میچ میں سری لنکا نے افغانستان کو چھ وکٹوں سے شکست دی۔ لنکن ٹیم نے 170 رنز کا ہدف صرف چار وکٹوں کے نقصان پر اور آٹھ گیندیں قبل ہی حاصل کر لیا۔
