اسلام آباد (نیوز ڈیسک) پاکستان اور سعودی عرب کے درمیان طے پانے والے اسٹریٹجک دفاعی معاہدے پر بھارت نے باضابطہ ردِعمل دے دیا ہے۔بھارتی وزارتِ خارجہ کے ترجمان رندھیر جیسوال نے سوشل میڈیا پلیٹ فارم ایکس پر بیان دیتے ہوئے کہا کہ نئی دہلی اس پیش رفت سے پہلے ہی آگاہ تھی اور معاہدے پر دستخط سے متعلق آنے والی رپورٹس کو بغور دیکھ رہی ہے۔
ترجمان کا کہنا تھا کہ بھارتی حکومت اپنی قومی سلامتی اور مفادات کے تحفظ کے لیے ہر ضروری اقدام کرے گی اور ساتھ ہی اس معاہدے کے خطے اور عالمی امن پر ممکنہ اثرات کا جائزہ بھی لیا جا رہا ہے۔واضح رہے کہ گزشتہ روز ریاض میں وزیراعظم شہباز شریف اور سعودی ولی عہد محمد بن سلمان نے “اسٹریٹجک باہمی دفاعی معاہدہ” (SMDA) پر دستخط کیے۔ اس معاہدے کے مطابق اگر کسی ایک ملک پر بیرونی جارحیت ہوتی ہے تو اسے دونوں ممالک کے خلاف حملہ تصور کیا جائے گا۔یہ معاہدہ پاکستان اور سعودی عرب کے بڑھتے ہوئے اسٹریٹجک تعلقات اور سکیورٹی تعاون کو مزید مضبوط بنانے کی عکاسی کرتا ہے۔
