نومبر 2022 میں جب چیٹ جی پی ٹی متعارف کرایا گیا تو اوپن اے آئی نے اسے دفتری کاموں کے لیے ایک انقلابی ٹول قرار دیا تھا۔ یہ اے آئی پر مبنی چیٹ بوٹ ای میلز کے جواباسلام آباد(نیوز ڈیسک)  دینے اور سرکاری یا دفتری خطوط تحریر کرنے کی صلاحیت رکھتا ہے۔

اب اوپن اے آئی نے پہلی مرتبہ ایک جامع رپورٹ شائع کی ہے جس میں دنیا بھر کے صارفین کے استعمال کے رجحانات پر روشنی ڈالی گئی ہے۔ رپورٹ کے نتائج نے سب کو حیران کر دیا ہے کیونکہ اس سے واضح ہوا ہے کہ چیٹ جی پی ٹی کو لوگ دفتری ضروریات کے بجائے ذاتی مقاصد کے لیے زیادہ استعمال کر رہے ہیں۔

اعداد و شمار کے مطابق 2024 کے وسط میں چیٹ جی پی ٹی پر ہونے والی تقریباً 50 فیصد گفتگو ملازمت یا کام سے متعلق تھی، تاہم 2025 کے وسط تک یہ شرح گھٹ کر صرف 27 فیصد رہ گئی۔

اس کا مطلب یہ نہیں کہ اس پلیٹ فارم کا استعمال کم ہو گیا ہے، بلکہ حقیقت یہ ہے کہ دنیا بھر میں ہر ہفتے 70 کروڑ سے زائد صارفین چیٹ جی پی ٹی استعمال کر رہے ہیں اور روزانہ ڈھائی ارب سے زیادہ پیغامات بھیجے جاتے ہیں، یعنی ہر سیکنڈ میں تقریباً 29 پیغامات۔

یہ رپورٹ اوپن اے آئی نے نیشنل بیورو آف اکنامک ریسرچ، ڈیوک یونیورسٹی اور ہارورڈ یونیورسٹی کے اشتراک سے تیار کی ہے۔

رپورٹ کے مطابق چیٹ جی پی ٹی کا تقریباً 80 فیصد استعمال تین شعبوں پر مشتمل ہے:

1. عملی رہنمائی (پریکٹیکل گائیڈنس)

2. معلومات کا حصول

3. تحریری کام (رائٹنگ)

عملی رہنمائی سب سے زیادہ استعمال ہونے والا پہلو ہے، جس میں لوگ مختلف موضوعات کو سمجھنے، نئی چیزیں سیکھنے، “کس طرح کریں” جیسے سوالات یا تخلیقی آئیڈیاز کے لیے چیٹ جی پی ٹی سے رجوع کرتے ہیں۔

تفصیلات کے حصول کو کمپنی نے روایتی سرچ انجن کا متبادل قرار دیا ہے، جبکہ رائٹنگ کے دائرے میں ای میلز، دستاویزات لکھوانا، ترمیم یا ترجمہ شامل ہے۔

ملازمت سے جڑے کاموں میں بھی زیادہ تر توجہ تحریری کام پر مرکوز ہے، جون 2025 میں اس کا تناسب 40 فیصد رہا، جبکہ صرف 4.2 فیصد پیغامات کمپیوٹر پروگرامنگ سے متعلق تھے۔

دلچسپ بات یہ ہے کہ ذاتی استعمال میں اضافے کے باوجود چیٹ جی پی ٹی پر ورچوئل تعلقات یا سماجی و جذباتی مسائل پر بات کرنے والے پیغامات کی تعداد بہت کم رہی۔

رپورٹ کے دیگر نکات کے مطابق:

• خواتین، مردوں کے مقابلے میں زیادہ استعمال کرتی ہیں (شرح 52 فیصد)۔

• 18 سے 25 سال کی عمر کے صارفین سب سے زیادہ ہیں (46 فیصد) جو زیادہ تر مشاغل یا ذاتی دلچسپی کے معاملات پر سوال کرتے ہیں۔

• زیادہ تر استعمال اسمارٹ فونز کے ذریعے ہوتا ہے۔

• کم یا متوسط آمدنی والے ممالک میں اس ٹیکنالوجی کی مقبولیت تیزی سے بڑھ رہی ہے۔

یوں یہ کہا جا سکتا ہے کہ چیٹ جی پی ٹی نے عالمی سطح پر لوگوں کی زندگیوں اور کام کرنے کے طریقوں پر نمایاں اثر ڈالا ہے۔