اسلام آبا د(نیوز ڈیسک)کینسر ایک ایسا جان لیوا مرض ہے جو تیزی سے عام ہو رہا ہے، خاص طور پر نوجوانوں میں اس کے کیسز میں نمایاں اضافہ دیکھنے میں آ رہا ہے۔ تاہم ماہرین کے مطابق روزمرہ زندگی میں ایک سادہ عادت اپنا کر اس مرض سے بچاؤ یا اس پر قابو پانے میں مدد مل سکتی ہے، اور وہ ہے ورزش۔آسٹریلیا کی ایڈتھ کوون یونیورسٹی میں کی گئی ایک تحقیق میں انکشاف ہوا کہ روزانہ صرف ایک بار سخت جسمانی مشق کرنا کینسر کے خلاف لڑائی میں مؤثر کردار ادا کر سکتا ہے۔

تحقیق کے مطابق ورزش سے جسم میں myokines نامی پروٹین کی مقدار بڑھتی ہے، جو سرطان کے خلیات کی افزائش کو 20 سے 30 فیصد تک کم کرنے کی صلاحیت رکھتا ہے۔ ماہرین کے بقول ورزش کینسر کے خلاف ایک دوا کی طرح اثر دکھاتی ہے، اور سائنسی شواہد اس بات کی تصدیق کرتے ہیں۔اس مطالعے میں بریسٹ کینسر پر قابو پانے والی خواتین کے جسم میں ورزش سے پہلے اور بعد myokines کی سطح کا تجزیہ کیا گیا۔ نتائج سے معلوم ہوا کہ محض 30 منٹ کی ورزش سے اس پروٹین کی مقدار میں واضح اضافہ ہوتا ہے۔محققین نے بتایا کہ اگرچہ صحت مند افراد میں اس اضافے کی توقع تھی، لیکن یہ دیکھنا اہم تھا کہ مریضوں کے جسم میں بھی ایسا ممکن ہے یا نہیں—اور تحقیق نے اس کی تصدیق کر دی۔انہوں نے مزید کہا کہ ورزش کو معمول کا حصہ بنانے سے جسم میں سوزش (ورم) کی سطح کم کی جا سکتی ہے، جو کینسر کی بڑھوتری اور مدافعتی نظام کی کمزوری میں اہم کردار ادا کرتی ہے۔تحقیق کے مطابق ورزش نہ صرف جسم میں چربی کم کرتی ہے بلکہ ورم کو کنٹرول میں رکھنے میں بھی مددگار ثابت ہوتی ہے، جس سے علاج کے نتائج بہتر ہو سکتے ہیں۔یہ تحقیق جرنل بریسٹ کینسر ریسرچ اینڈ ٹریٹمنٹ میں شائع ہوئی۔