اسلام آباد (نیوز ڈیسک)  گریٹر مانچسٹر پولیس نے پاکستانی کرکٹر حیدر علی سے متعلق تفصیلات جاری کر دی ہیں۔

پولیس کے مطابق 4 اگست کو جنسی زیادتی کی ایک شکایت موصول ہوئی، جس کا مبینہ واقعہ 23 جولائی کو مانچسٹر کے علاقے میں پیش آیا۔ اس الزام میں 24 سالہ ایک شخص کو گرفتار کیا گیا، تاہم تحقیقات جاری رہنے تک اسے ضمانت پر رہا کر دیا گیا۔

واضح رہے کہ گزشتہ روز یہ خبر سامنے آئی تھی کہ مانچسٹر میں ایک خاتون سے مبینہ زیادتی کے الزام میں قومی کرکٹر حیدر علی کو گرفتار کیا گیا تھا، جس کے بعد وہ ضمانت پر رہا ہو گئے۔

ذرائع کے مطابق انگلینڈ پولیس نے حیدر علی کو دو ہفتے بعد دوبارہ پیش ہونے کا حکم دیا ہے اور اس دوران ان پر برطانیہ چھوڑنے کی پابندی عائد کر دی گئی ہے۔

یہ معاملہ پاکستان شاہینز کے حالیہ دورۂ انگلینڈ کے دوران سامنے آیا۔ دوسری جانب پاکستان کرکٹ بورڈ (پی سی بی) نے حیدر علی کو معطل کر دیا ہے۔ پی سی بی کا کہنا ہے کہ وہ مانچسٹر پولیس کے ایک فوجداری مقدمے میں زیرِ تفتیش ہیں، اسی وجہ سے انہیں فوری طور پر کرکٹ سرگرمیوں سے روک دیا گیا ہے۔