اسلام آباد (نیوز ڈیسک)بھارتی فلم انڈسٹری سے جُڑی کئی حیرت انگیز اور دل دہلا دینے والی خبریں وقتاً فوقتاً سامنے آتی رہتی ہیں۔ کبھی کسی اداکارہ کو فلم میں کاسٹ کرنے کے لیے پھولوں سے بھرے ٹرک کا تحفہ دیا جاتا ہے تو کبھی کسی فلم کی کامیابی پر منفرد انداز میں جشن منایا جاتا ہے، لیکن حال ہی میں ساؤتھ کے معروف اداکار وجے انٹونی کے ساتھ ایسا واقعہ پیش آیا جس نے مداحوں کو بھی افسردہ کر دیا۔

بھارتی میڈیا کے مطابق وجے انٹونی، جو جنوبی بھارت کی فلم انڈسٹری میں ایک بڑا نام ہیں، گزشتہ برس ایک ذاتی سانحے سے گزرے جس نے ان کی زندگی بدل کر رکھ دی۔ ان کی بیٹی میرا، جو کہ ان کی دو بیٹیوں میں بڑی تھی، نے 19 ستمبر 2023 کو اپنے گھر میں خودکشی کر لی۔ ملازمہ نے اس دل خراش منظر کو سب سے پہلے دیکھا، اور یہ واقعہ پورے خاندان کو گہرے دکھ میں مبتلا کر گیا۔فلم ساز وجے ملٹن نے بتایا کہ اس واقعے کے بعد وجے انٹونی نے ایک انتہائی جذباتی قدم اٹھاتے ہوئے ہمیشہ کے لیے جوتے پہننا چھوڑ دیے۔ ان کا کہنا ہے کہ وجے نے اپنی بیٹی کے دکھ کو کم کرنے کے لیے خود کو کام میں مصروف رکھا، مگر وہ اب تک اس غم سے باہر نہیں نکل پائے۔

فلم ڈائریکٹر کے مطابق وہ گزشتہ دو دہائیوں سے وجے انٹونی کو جانتے ہیں، لیکن پچھلے دو برسوں میں وہ ان کے ساتھ زیادہ قریبی تعلق میں آئے اور انہوں نے وجے کی زندگی کا سب سے تکلیف دہ دور خود دیکھا۔انہوں نے مزید بتایا کہ اداکار پچاکاران 2 کی شوٹنگ کے دوران شدید زخمی بھی ہوئے تھے، اور اسی دوران ان کی بیٹی کی موت کی خبر انہیں ملی۔ تب سے وہ مسلسل مصروف رہ کر غم کو بھلانے کی کوشش کر رہے ہیں، لیکن زخم ابھی بھی بھر نہیں پائے۔یہ واقعہ نہ صرف ایک باپ کے کرب کی عکاسی کرتا ہے بلکہ فلمی دنیا کی چکا چوند کے پیچھے چھپے دکھ اور تکلیف کو بھی اجاگر کرتا ہے۔