اسلام آباد (نیوز ڈیسک) کم عمر ٹک ٹاکر ثناء یوسف کے قتل کے کیس میں اہم پیش رفت سامنے آئی ہے۔ قاتل کو پولیس نے فیصل آباد سے گرفتار کر کے اسلام آباد منتقل کر دیا ہے۔ اطلاعات کے مطابق گرفتار ہونے والا شخص خود بھی ٹک ٹاک پر فعال تھا۔ اس معاملے سے متعلق معروف صحافی رضوان غلزئی نے سوشل میڈیا پلیٹ فارم ایکس (سابقہ ٹوئٹر) پر مزید تفصیلات شیئر کی ہیں۔

رضوان غلزئی کے مطابق، ملزم عمر حیات عرف کاکا فیصل آباد سے ایک قیمتی گاڑی (فارچونر) کرائے پر لے کر اسلام آباد پہنچا اور اس دوران خود کو ایک زمین دار کا بیٹا ظاہر کیا۔ گاڑی کا کرایہ بھی اس نے ادا نہیں کیا۔ وہ ثناء یوسف کی سالگرہ کے موقع پر کیک اور تحفے لے کر سیکٹر G-13 آیا لیکن ثناء نے ملاقات سے صاف انکار کر دیا۔ اسی انکار پر دل برداشتہ ہو کر ملزم نے قتل جیسا سنگین قدم اٹھایا، جس کا بعد میں اس نے خود بھی اعتراف کیا۔

یاد رہے کہ ثناء یوسف کا تعلق چترال سے تھا اور ان کی تدفین بھی وہیں کی گئی۔ مقتولہ کے والد نے حکام سے اپیل کی ہے کہ وہ کیس کی مکمل اور شفاف تحقیقات کریں اور ان کی بیٹی کو انصاف دلایا جائے۔ ان کا کہنا ہے کہ وہ پرامن لوگ ہیں اور ان کی کسی سے کوئی ذاتی دشمنی نہیں ہے۔

ٹک ٹاکر ثنا یوسف کا مبینہ قاتل رینٹ پر فارچونر گاڑی لے کر فیصل آباد سے اسلام آباد آیا، خود کو لینڈ لارڈ کا بیٹا بتاتا، گاڑی کا رینٹ بھی ادا نہیں کیا۔ ثنا کی سالگرہ پر کیک اور تحائف لے کر جی 13 پہنچا تو ثنا نے ملنے سے انکار کر دیا، ملزم نے اعتراف کیا ہے کہ نہ ملنے کا رنج تھا۔ pic.twitter.com/2Kvfv81hpv

— Rizwan Ghilzai (Remembering Arshad Sharif) (@rizwanghilzai) June 4, 2025