اسلام آباد (نیوز ڈیسک)دو روز قبل اسلام آباد میں ثناء یوسف کو ان کے گھر میں گولیاں مار کر ہلاک کر دیا گیا تھا۔ واقعے کے بعد ملزم موقع سے فرار ہو کر فیصل آباد چلا گیا تھا جہاں سے پولیس نے اسے گرفتار کر لیا۔پولیس حکام کے مطابق گرفتار شخص کی شناخت عمر حیات عرف کاکا کے نام سے ہوئی ہے، جو خود بھی سوشل میڈیا پر ایک فعال ٹک ٹاکر ہے۔ ملزم نے دعویٰ کیا کہ وہ مقتولہ کا قریبی دوست تھا۔

انسپکٹر جنرل (آئی جی) اسلام آباد نے ایک پریس کانفرنس میں بتایا کہ پولیس نے 12 گھنٹے کے اندر ملزم کو فیصل آباد سے حراست میں لے لیا۔ انہوں نے یہ بھی بتایا کہ ملزم نے دورانِ تفتیش قتل کا اعتراف کر لیا ہے۔آئی جی کے مطابق، عمر حیات نے ثبوت مٹانے کے لیے ثناء یوسف کا موبائل فون بھی ساتھ لے گیا تھا۔ مزید یہ کہ مقتولہ کی جانب سے بارہا انکار اور فاصلہ رکھنے پر ملزم نے انتقامی کارروائی کرتے ہوئے یہ قدم اٹھایا۔

ادھر ثناء یوسف کے والد، یوسف حسن نے میڈیا سے گفتگو کرتے ہوئے کہا کہ ان کی کسی سے کوئی ذاتی دشمنی نہیں ہے۔ انہوں نے حکومت سے مطالبہ کیا کہ ان کی بیٹی کے قتل میں ملوث مجرم کو سخت سزا دی جائے اور مکمل انصاف فراہم کیا جائے۔