لاہور( این این آئی)پاکستانی کرکٹ ٹیم کے سابق کپتان شاہد آفریدی مقبوضہ کشمیر میں پہلگام واقعے کے بعد پاک فوج کی وردی پہنے واہگہ بارڈر پر پہنچ گئے جس کی ویڈیو سوشل میڈیا پر وائرل ہو رہی ہے۔شاہد آفریدی نے ویڈیو اپنے سوشل میڈیا اکائونٹ پر بھی شیئر کی جس میں وہ واہگہ بارڈر پر پاک فوج کے جوانوں کے ساتھ بیٹھے نظر آ رہے ہیں۔

انہوں نے بھارت کو واضح پیغام دیتے ہوئے کہا ہے کہ عزت سے ہمارے گھر آئو گے تو عزت کریں گے اور چائے بھی پلائیں گے، ہمیں بدمعاشی نہ دکھائو۔شاہد آفریدی نے مزید کہا کہ آپ نے پانی بند کر کے اپنا نقصان ہی کرنا ہے، آپ کے مہمانوں کو چائے کون بنا کر دے گا۔انہوں نے کہا کہ ہمیں بدمعاشی نہ دکھائو، اگر دکھائوگے تو ہماری تاریخ اور کلچر طاقت ہے، جواب ملے گا۔شاہد آفریدی نے مودی سرکار کو آڑے ہاتھوں لیتے ہوئے مقبوضہ کشمیر میں سیاحوں پر حملے کو روکنے میں ناکامی پر بھارتی فوج کو نالائق اور نکما قرار دیتے ہوئے کہا کہ بھارت میں پٹاخہ بھی پھٹ جائے تو الزام پاکستان پر دھردیا جاتا ہے۔

انہوں نے مزید کہا کہ تم لوگوں کی 8 لاکھ فوج وہاں کشمیر میں بیٹھی ہے اور یہ واقعہ ہوگیا، اس کا مطلب ہوا کہ سب نالائق اور نکمے ہیں ،جو اپنے لوگوں کو سکیورٹی نہیں دے سکے۔