سری نگر (نمائندہ خصوصی):مقبوضہ جموں و کشمیر کے معروف سیاحتی مقام پہلگام میں پیش آنے والے افسوسناک واقعے میں نامعلوم حملہ آوروں کی اندھا دھند فائرنگ کے نتیجے میں 27 سیاح جاں بحق جبکہ 12 دیگر زخمی ہو گئے۔

بھارتی ذرائع ابلاغ کے مطابق ہلاک اور زخمی ہونے والے افراد میں بڑی تعداد بھارتی ریاست گجرات اور کرناٹکا سے تعلق رکھنے والے سیاحوں کی ہے۔

واقعے پر اظہار افسوس کرتے ہوئے مقبوضہ کشمیر کے موجودہ وزیراعلیٰ عمر عبداللہ نے اسے گزشتہ کئی سالوں میں ہونے والا سب سے سنگین حملہ قرار دیا ہے۔ انہوں نے مزید کہا کہ متاثرین کی صحیح تعداد معلوم کی جا رہی ہے۔

دوسری جانب سابق وزیراعلیٰ محبوبہ مفتی نے واقعے پر شدید ردعمل کا اظہار کرتے ہوئے اس کی سخت الفاظ میں مذمت کی ہے۔

اس خونی واقعے کے بعد امریکی نائب صدر جی ڈی وانس، جو ان دنوں بھارت کے دورے پر ہیں، نے حملے کی مذمت کرتے ہوئے متاثرہ خاندانوں سے اظہار یکجہتی کیا ہے۔

بین الاقوامی خبررساں اداروں کے مطابق واقعے کی سنگینی کو دیکھتے ہوئے بھارتی وزیر داخلہ امیت شاہ فوری طور پر سری نگر پہنچ گئے، جہاں انہوں نے وزیراعلیٰ عمر عبداللہ سے ملاقات کر کے سیکیورٹی کی صورتحال کا جائزہ لیا۔

حملے کے بعد ملک کے مختلف شہروں میں سیکیورٹی مزید سخت کر دی گئی ہے، خاص طور پر ممبئی کے اہم مقامات پر اضافی سیکیورٹی نفری تعینات کر دی گئی ہے تاکہ کسی بھی ممکنہ خطرے سے نمٹا جا سکے۔