اسلام آباد (نیوز ڈیسک) پاکستان کی مشہور سوشل میڈیا شخصیت اور ٹک ٹاک اسٹار ربیکا خان کو حالیہ بیان کے باعث آن لائن تنقید کا سامنا کرنا پڑ رہا ہے، جس میں انہوں نے دعویٰ کیا کہ ان کے والد، معروف کامیڈین کاشف خان، بالی ووڈ کے سپر اسٹار شاہ رخ خان کے ساتھ کام کر چکے ہیں۔
یہ گفتگو ربیکا خان نے ایک نجی نیوز چینل کے پوڈکاسٹ میں شرکت کے دوران کی، جہاں انہوں نے مختلف موضوعات پر کھل کر بات کی۔ شاہ رخ خان سے متعلق سوال پر ربیکا نے کہا، “میرے والد بھارت میں شاہ رخ خان کے ساتھ ایک فلم کی پروموشن کے سلسلے میں کام کر چکے ہیں، اور شاہ رخ خان خود میرے والد سے ملاقات کے لیے آئے تھے۔”
میزبان نے جب ان سے اس منصوبے کی تفصیلات پوچھیں تو ربیکا نے کہا کہ انہیں اس پروجیکٹ کے بارے میں مکمل معلومات نہیں ہیں۔ تاہم، انہوں نے دعویٰ کیا کہ “میرے والد کی شاہ رخ کے ساتھ تصویریں موجود ہیں، اور شاہ رخ نے میرے والد سے کہا تھا کہ وہ ان کے کام کو سراہتے ہیں اور انہیں فالو کرتے ہیں۔”
ربیکا نے مزید کہا کہ وہ خود بھی کئی مشہور شخصیات سے مل چکی ہیں، جن میں بھارتی اداکار متھن چکرورتی اور سنجے دت شامل ہیں۔ “ہم نے سنجے دت کے ساتھ ایک بار لنچ بھی کیا تھا،” انہوں نے کہا۔
ربیکا خان کے اس بیان کے بعد سوشل میڈیا پر صارفین کی جانب سے ملے جلے ردعمل کا اظہار کیا جا رہا ہے۔ کئی افراد نے ان کے دعووں کو غیر حقیقی قرار دے کر تنقید کا نشانہ بنایا، جبکہ کچھ نے ان کے بیانات پر طنزیہ تبصرے بھی کیے۔
بعض صارفین کا کہنا ہے کہ ربیکا کو ایسے دعوے کرنے سے پہلے ان کی تصدیق کرنی چاہیے، کیونکہ اس طرح کے مبالغہ آمیز بیانات عوامی سطح پر مذاق بننے کا سبب بن سکتے ہیں۔
