اسلام آباد (این این آئی) اے ٹی سی اسلام آباد نے گرفتار صحافی مطیع اللہ جان کا دو روزہ جسمانی ریمانڈ منظور کرلیا۔ جمعرات کو گرفتار سینئر صحافی مطیع اللہ جان کو انسداد دہشت گردی عدالت کے جج طاہرعباس سپرا کی عدالت میں پیش کیا گیا، پراسیکیوٹر راجہ نوید عدالت میں پیش ہوئے جبکہ مطیع اللہ جان کی جانب سے ایڈووکیٹ فیصل چوہدری پیش ہوئے۔پراسیکیوٹر نے ملزم کے 30روزہ ریمانڈ کی استدعا کی ،وکیل فیصل چوہدری نے ملزم کے جسمانی ریمانڈ کی مخالفت کرتے ہوئے کہا کہ ہمیں تھوڑا وقت دیا جائے مشاورت کرنی ہے۔

عدالت نے مطیع اللہ جان کے 30دن ریمانڈ کی استدعا پر فریقین کے دلائل کے بعد فیصلہ محفوظ کرلیا ۔بعد ازاں عدالت نے فیصلہ سناتے ہوئے ان کا 2روزہ جسمانی ریمانڈ منظور کرتے ہوئے پولیس کے حوالے کردیا۔واضح رہے کہ صحافی مطیع اللہ جان پر پولیس کو تشدد کا نشانہ بنانے، اسلحہ چھیننے اور منشیات رکھنے کا الزام ہے۔ مقدمے میںکہا گیا ہے کہ گزشتہ رات اسلام آباد پولیس نے صحافی مطیع اللہ جان کو کو ای نائن چیک پوسٹ سے گرفتار کیا۔مطیع اللہ کی گاڑی کو رات اسلام آباد ناکے پر رکنے کا اشارہ کیا، ان کی گاڑی کی ٹکر سے ڈیوٹی پر مامور کانسٹیبل مدثر زخمی ہو گیا، مطیع اللہ جان نے سرکاری اسلحہ چھین کر جوان کو جان سے مارنے کی دھمکی دی۔ایف آئی آر کے مطابق ملزم نشے میں تھا، ملزم کی گاڑی سے آئس بھی برآمد ہوئی ہے۔