لاہور ( این این آئی) دبئی سے آنے والے ایک مسافر سے ایک کلو سونے کے زیورات اور کروڑوں روپے مالیت کا سامان برآمد کر لیا گیا۔ کلیکٹر کسٹمز طیبہ کیانی کی خفیہ اطلاع پر علامہ اقبال انٹر نیشنل ایئر پورٹ لاہور پر کسٹمز نے کارروائی کرتے ہوئے کروڑوں روپے مالیت کا سونا، موبائل فون اور دیگر قیمتی اشیا اسمگل کرنے کی کوشش ناکام بنا دی۔

علامہ اقبال انٹرنیشنل ایئرپورٹ پر دبئی سے آنے والے ایک مسافر سے ایک کلو 28گرام سونے کے زیورات، 06عدد ڈائمنڈ پیجز اور 05عدد مو بائل فونز پاکستان اسمگل کرنے کی کوشش ناکام بنا دی گئی۔ملزم آصف کو موقع پر گرفتار کر کے برآمد ہونے والا سامان بحق سرکار ضبط کر لیا گیا، جس کی کل مالیت تقریباً 3کروڑ 22لاکھ بنتی ہے۔ دبئی سے لاہور آنے والی ایئر بلیو انٹرنیشنل کی فلائٹ نمبر 417-PAسے ملزم نے سونے کے زیورات، ڈائمنڈ اور موبائل فونز زیر تن کپڑوں کے نیچے خفیہ طور پر چھپا رکھے تھے، جسے محکمہ کسٹمز کے اہلکاروں نے بروقت کارروائی کرتے ہوئے ناکام بنایا۔ملزم کے خلاف کسٹمز ایکٹ کے تحت مقدمہ درج کرکے تفتیش شروع کردی گئی ہے۔