اسلام آباد (این این آئی)وزیراعظم شہباز شریف نے شوگر ملز اور شوگر ڈیلرز کے حوالے سے بڑا فیصلہ کرتے ہوئے فیڈرل بورڈ آف ریونیوز( ایف بی آر)، انٹیلی جنس بیورو (آئی بی) اور فیڈرل انویسٹی گیشن ایجنسی (ایف آئی اے) کو ہدایت کی ہے کہ شوگرسیکٹرمیں سیلز ٹیکس کی چوری سدباب یقینی بنایاجائے۔

میڈیارپورٹ کے مطابق وزیراعظم نے کہا کہ گنے کی کرشنگ کا سیزن شروع ہو رہا ہے،شوگر ملوں، ڈیلرز سے جی ایس ٹی کی 100 فیصد وصولی یقینی بنایا جائے، ٹیکس چوری،ذخیرہ اندوزی میں ملوث شوگرملزمالکان کیخلاف سخت قانونی کارروائی کی جائیگی۔وزیراعظم نے کہاکہ کیمروں کے ذریعے شوگر ملوں کے پیداواری عمل اور ذخیرہ اندوزی پر نظر رکھی جائے گی، سیلز ٹیکس کی وصولی یقینی بنائی جائے گی۔

وزیراعظم نے شوگر سٹہ مافیا کے خلاف سخت کارروائی کی ہدایت کرتے ہوئے کہا کہ چینی کی قیمتوں میں اضافہ کسی صورت برداشت نہیں کیا جائے گا۔وزیراعظم نے ہدایت کی کہ اسٹیل، سگریٹ، سیمنٹ اور مشروبات سمیت دیگر شعبوں میں بھی اسی طرح کے اقدامات کیے جائیں۔