نیویارک (این این آئی)دنیا بھر میں لوگوں کی اکثریت نت نئے ملبوسات پہننے اور منفرد فیشن اختیار کرنے کی خواہش رکھتی ہے لیکن مزے کی بات یہ ہے کہ دنیا کے کامیاب ترین افراد کپڑوں کے انتخاب اور فیشن کے جھنجھٹ سے آزاد نظر آتے ہیں۔ گھر سے نکلنے سے پہلے سب کو فکر ہوتی ہے کہ آج کیا پہنیں ؟۔ کوئی مختلف رنگوں کا دلدادہ ہے تو کسی کو منفرد نظر آنے میں دلچسپی مگر دنیا کے کامیاب ترین اور مشہور افراد کپڑوں کے انتخاب کی فکر نہیں کرتے۔ان افراد میں امریکی صدر باراک اوباما، فیس بک کے بانی مارک زرگ برگ، سیگوے سکوٹر کے موجد ڈین کمین ، معروف ہالی وڈ ڈائریکٹر کرسٹوفر نولان ، گلوکار ہنری رولنز شامل ہیں۔ یہ تمام افراد اکثر اوقات ایک ہی رنگ کے لباس میں نظر آتے ہیں۔اوباما کہتے ہیں انھیں بہت سے اہم فیصلے کرنا ہوتے ہیں اس لئے وہ کپڑوں کے انتخاب میں وقت ضائع نہیں کرنا چاہتے۔ مارک زرگ برگ کا کہنا ہے کہ وہ کپڑوں کی خریداری سے زیادہ معاشرے کی خدمت کو ضروری سمجھتے ہیں ۔ کچھ ایسی ہی سوچ دیگر مشہور شخصیات کی ہے۔