واشنگٹن(این این آئی)امریکہ اور صومالیہ کے درمیان ایک معاہدہ طے پایا ہے جس کے تحت افریقی ملک صومالیہ کا ایک ارب ڈالر سے زیادہ کا قرضہ امریکہ نے معاف کر دیا ہے۔غیرملکی خبررساں ادارے کی رپورٹ کے مطابق صومالیہ کی پارلیمان نے اس معاہدے کا اعلان سال 2025 کیلئے 1.36 ارب ڈالر کے بجٹ کی پارلیمان سے منظوری کے ایک دن بعد کیا ہے۔
گزشتہ روز ہونے والے اس معاہدے پر صومالیہ کے وزیر خزانہ بیہی آیگے اور امریکی سفیر رچرڈ ریلی نے دستخط کیے ہیں۔صومالیہ کے وزیر خزانہ نے اس موقع پر کہا کہ یہ ایک عظیم دن ہے اس معاہدے سے صومالیہ کا 1.14 ارب ڈالر کا قرضہ معاف ہوگیا ہے۔انہوں نے کہا کہ صومالیہ نے امریکہ اور عالمی شراکت داروں کی مدد سے کام کے طریقوں کو بہتر کیا ، مالی معاملات میں جوابدہی شامل کی گئی اور نئے قوانین طے کیے ہیں۔وزیر خزانیہ صومالیہ نے سوشل میڈیا پلیٹ فارم ایکس پر کی گئی پوسٹ میں صومالیہ کی ترقی اور اقتصادی اصلاحات کیلئے امریکہ کی غیر متزلزل حمایت پر امریکہ کا شکریہ ادا کیا۔
امریکی سفیر رچرڈ ریلی نے کہاکہ ان قرضوں کی معافی کے علاوہ صومالیہ کو 1.2 ارب ڈالر ترقیاتی و اقتصادی بجٹ، سیکیورٹی اور انسانی بنیادوں پر امداد کیلئے فراہم کیے گئے ہیں۔پارلیمان سے منظور کیے گئے بجٹ کا حجم رواں سال کے بجٹ سے تقریباً 25 گنا زیادہ ہے۔ وزیر خزانہ کے مطابق سال 2024 کے دوران اقتصادی ترقی کی شرح 3.7 فیصد تھی جبکہ سال 2025 کے لیے اقتصادی ترقی کی شرح 3.9 فیصد رکھی گئی ہے جو کہ گزشتہ سال 2.8 فیصد تھی۔
