لاہور / کراچی(نیوز ڈیسک) سندھ و پنجاب میں گنے کی کرشنگ شروع ہونے کی توقعات کے باعث کراچی ہول سیل مارکیٹ میں چینی 54 روپے کلو کی سطح پر آگئی۔شوگر ڈیلرز ایسوسی ایشن کے مطابق ہول سیل سطح پر چینی مزید 2 روپے کلو سستی ہونے کے بعد 54 روپے کلو ہوچکی ہے، ایک ماہ کے دوران چینی کی قیمتوں میں لگ بھگ 6 روپے فی کلو کمی آ چکی ہے۔ انڈسٹری ذرائع کے مطابق صوبے میں چینی کا وافر اسٹاک ہونے اور گنے کی کرشنگ کا نیا سیزن جلد شروع ہونے کی توقعات کے باعث چینی کی قیمتوں میں کمی کا رحجان دیکھا جا رہا ہے۔ دریں اثناء گنے کے کاشت کاروں کی جانب سے آنے والے سیزن میں گنے کی فی من امدادی قیمت 230 روپے مقرر کرنے کا مطالبہ کیا گیا ہے جبکہ گزشتہ سیزن میں امدادی قیمت 185 روپے من مقرر کی گئی تھی۔