ممبئی (این این آئی)بدنام زمانہ بھارتی گینگسٹر لارنس بشنوئی گینگ کے ساتھ دشمنی ختم کرنے کے لیے بالی وڈ اداکار سلمان خان سے 5 کروڑ روپے مانگنے والے شخص نے یہ کہتے ہوئے معافی مانگ لی کہ اس سے غلطی ہوگئی۔بھارتی میڈیا رپورٹس کے مطابق کچھ روز قبل لارنس بشنوئی گینگ کے ایک رکن کی جانب سے ممبئی ٹریفک پولیس کو واٹس ایپ پیغام موصول ہوا ہے جس میں اداکار کو جانے سے مارنے کی دھمکی دی گئی تھی۔
اس پیغام میں کہا گیا ہے کہ اگر سلمان خان زندہ رہنا چاہتے ہیں اور دیرینہ دشمنی ختم کرنا چاہتے ہیں تو 5 کروڑ روپے ادا کریں، اس دھمکی کو ہلکا نہ لیں، بصورت دیگر اداکار کا حال مہاراشٹرا کے سابق وزیر بابا صدیقی سے بھی بدتر ہو گا جنہیں حال ہی میں بشنوئی گینگ نے گولی مار کر قتل کردیا تھا۔اب اسی شخص کی جانب سے دوبارہ ممبئی پولیس کو پیغام موصول ہوا ہے۔مذکورہ شخص کی جانب سے پیغام میں کہا گیا کہ مجھ سے غلطی ہوگئی، وہ پیغام سلمان خان کے لیے غلطی سے بھیج دیا گیا تھا۔
بھارتی میڈیا کے مطابق ممبئی ٹریفک پولیس کو یہ پیغام جھارکھنڈ سے موصول ہوا ہے جس کی لوکیشن ٹریس کی جارہی ہے، پولیس کا کہنا ہے کہ دھمکی دینے والے شخص کے خلاف کارروائی عمل میں لائی جائے گی۔واضح رہے کہ یہ پہلا موقع نہیں ہے جب سلمان خان کو بشنوئی گینگ کی طرف سے جان سے مارنے کی دھمکی دی گئی ہو، 2022 میں اداکار کو دھمکی آمیز خط ان کی رہائش گاہ کے قریب ایک بینچ سے ملا تھا اور مارچ 2023 میں مبینہ طور پر گینگ کے ارکان کی طرف سے ایک ای میل بھیجی گئی تھی۔جنوری 2024 میں دو نامعلوم افراد نے جعلی شناخت کا استعمال کرتے ہوئے سلمان خان کے پنویل فارم ہاؤس میں گھسنے کی کوشش کی تھی جس کے بعد اداکار کی سکیورٹی مزید سخت کردی گئی تھی۔
