اسلام آباد (این این آئی)بیرونِ ملک مقیم پاکستانیوں نے 3 مہینوں میں آئی ایم ایف کے 3 سالہ پروگرام سے زائد ڈالر پاکستان بھیج دیے۔اسٹیٹ بینک آف پاکستان (ایس بی پی) نے ماہ ستمبر 2024ء میں ورکرز ترسیلات زر کی تفصیلات جاری کردیں۔ترسیلات زر ستمبر 2024ء میں 2.8 ارب ڈالرز رہیں جو کہ ستمبر 2023ء کے مقابلے 29 فیصد زائد ہیں۔ سعودی عرب سے ستمبر میں 68 کروڑ ڈالر جبکہ متحدہ عرب امارات سے ستمبر میں 56 کروڑ ڈالر بھیجے گئے ہیں۔
تین مہینوں میں ورکرز ترسیلات کی ماہانہ اوسط 2.92 ارب ڈالر رہیں۔ سعودی عرب میں مقیم پاکستانیوں نے 3 ماہ میں 2.15 ارب ڈالر بھیجے۔متحدہ عرب امارات میں مقیم پاکستانیوں نے 3 ماہ میں 1.70 ارب ڈالر بھیجے جبکہ برطانیہ میں مقیم پاکستانیوں نے 3 ماہ میں 1.34 ارب ڈالر بھیجے ہیں۔یورپی یونین میں مقیم پاکستانیوں نے 3 ماہ میں 1.09 ارب ڈالر جبکہ امریکا سے 3 مہینوں میں 89 کروڑ ڈالر پاکستان بھیجے گئے۔علاوہ ازیں دیگر خلیجی ممالک سے تین مہینوں میں 86 کروڑ ڈالر بھیجے گئے۔
