اسلام آباد (این این آئی) سربراہ جے یو آئی(ف) مولانا فضل الرحمن نے کہا ہے کہ فوج کے سیاست سے الگ نہ ہونے تک ملک بحران سے نہیں نکل سکتا، طاقتور حلقے حقیقت جتنی جلدی سمجھ جائیں ملک ، خود ان کیلئے بہتر ہے۔ایک بیان میں سربراہ جے یو آئی (ف)مولانا فضل الرحمن نے کہا کہ موجودہ سیاسی بحران کو حل کرنے کے لئے فوج کو سیاست سے الگ ہونا پڑے گا،جب تک فوج خود کو سیاست سے الگ نہیں کرتی اس وقت تک ملک بحران سے نہیں نکل پائے گا۔

انہوں نے کہا کہ سیاسی قوتوں کے خلاف طاقت کا استعمال مسائل کا حل نہیں،اس سے سیاسی انتشار مزید بڑھے گا۔ انہوں نے کہا کہ تمام ادارے آئین کے مطابق طے شدہ دائرہ کار میں سمٹ جائیں تو ملک سنبھل سکتا ہے۔ انہوں نے کہا کہ طاقتور حلقے جتنی جلدی اس حقیقت کو سمجھ جائیں گے ملک اور خود ان کے لئے اتنا بہتر ہو گا، بصورت دیگر بگاڑ بڑھے گا۔ مولانا فضل الرحمن نے کہا کہ مقتدرہ تسلیم کر لے کہ موجودہ ہائبرڈ نظام ناکام ہو چکا ہے، سارے مسائل کا حل ملک میں از سر نو شفاف انتخابات کرانے میں مضمر ہے۔